Исроил Эронга ҳар қандай ҳужумга жавоб қайтарилиши билан таҳдид қилди

Эрон ҳужуми натижасида Исроил томонида қурбонлар бўлмаса ҳам жавоб зарбаси берилади, деб хабар қилди Исроил армияси радиоси.

Фото: Majid Asgaripour/WANA/Reuters

Исроил Эроннинг ҳар қандай тўғридан тўғри ҳужумига жавобан Ислом Республикаси ҳудудига зарба беради.

Исроил армияси радиосига кўра, Тел-Авив бу ҳақда АҚШ ва қатор Европа давлатларини хабардор қилган.

Радиостанциянинг қайд этишича, жавоб зарбаси Эрон ҳужуми натижасида Исроил томонида қурбонлар бўлмаган тақдирда ҳам амалга оширилади.

Исроил Эрон томонидан жорий йилнинг апрел ойида юзлаб учувчисиз учоқлар ва ракеталар учирилганидан кўра каттароқ ҳужумга тайёргарлик кўрмоқда, деб хабар берди кеча Исроилнинг KAN жамоат телеканали.

31 июл куни Фаластиннинг Ҳамас ҳаракати сиёсий бюроси раиси Исмоил Ҳания Теҳронда суиқасд натижасида ҳалок бўлди.

Эрон ва Ҳамас Исроилни қотилликни уюштирганликда айблади.

Эрон Ҳамас етакчисининг ўлдирилишига жавоб қайтаришга ваъда берди.

#Эрон #Исроил

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.