Туркиядаги ўзбекистонликлар болаларини мактабга беришда эътиборли бўлишга чақирилди

Ўзбекистоннинг Истанбулдаги Бош консулхонаси Туркиядаги ватандошларни болаларига мактаб танлашда эътиборли бўлишга чақирди.

«Сўнгги вақтларда ижтимоий тармоқлар орқали Истанбулда айрим хорижий давлатларнинг ўзбек болаларига мўлжалланган мактаблар рекламаси тарқалмоқда. Бу мактабларда хорижий тиллар, робототехника, диний билимлар, информатика ва жисмоний тарбия машғулотлари ўргатилиши эълон қилинмоқда. Ушбу ўқув юртларидаги диний дарслар «Аҳли сунна» ақидаси асосида экани таъкидланишига қарамай, айрим ўқитувчилардаги мўътадил исломга зид эътиқодий қарашларнинг таълим олувчиларга сингдирилиши келгусида жамиятимизда ақидавий зиддиятларни юзага келтириши мумкин. Шундан келиб чиққан ҳолда ота-оналардан вояга етмаган фарзандларини турли мактабларда мутаассиб қарашлар сингдирилишидан эҳтиёт қилишларини сўраймиз», дейилади баёнотда.