Зеленский Байден ва Трампга Украинанинг «ғалаба режаси»ни тақдим этади

Украина сентябр ойида Қўшма Штатларга ўз ғалабасига эришиш режасини тақдим этади, деди президент Володимир Зеленский матбуот анжуманида.

«Курск вилояти бизнинг режамизга киритилган - Украина ғалабаси режасига. Бу баъзилар учун жуда амбицияли туюлиши мумкин, аммо биз учун бу муҳим режадир», деди у.

Режанинг иккинчи йўналиши – «Украинанинг жаҳон хавфсизлик инфратузилмасидаги стратегик ўрни», учинчиси – «Россияни урушни дипломатик йўл билан тугатишга мажбурлашнинг кучли пакети», тўртинчиси эса «иқтисодий», деб давом этди Зеленский. Унинг аниқлик киритишича, режа биринчи навбатда Америка президенти Жо Байденга кўрсатилади. Кейин эса вице-президент Камала Ҳаррис ва республикачи номзод Доналд Трампга етказилади.

Бундан ташқари, Киев иккинчи тинчлик саммити режасини тайёрлашни режалаштирмоқда. Украина президенти Москвадан делегация таклиф қилишга тайёрлигини саммитнинг бошқа иштирокчилари позицияси билан изоҳлади: «Акс ҳолда биз иккинчи саммитда кўп сонли давлатларни йўқотишимиз мумкин».