Руминия Украинанинг Россия томонидан ўққа тутилишини қоралади

Руминия 8 сентябр, якшанбага ўтар кечаси Украинани ўққа тутиши чоғида Россия учувчисиз учоғи томонидан ўз ҳаво ҳудуди «яна бир бор бузиб кирилиши»ни кескин қоралади. Бу ҳақда мамлакат Мудофаа вазирлиги сайтида чоп этилган расмий пресс-релизда айтилади.

Вазирлик Россия ҳужумининг ўзини «ноқонуний» ва «халқаро қонунларга зид» деб атади ҳамда Россия армиясини фуқаролик нишонлари ва порт инфратузилмасига зарба беришда айблади.

Мамлакат Мудофаа вазирлиги маълум қилишича, маҳаллий вақт билан соат 02:25 дан бошлаб Руминия ҳарбий-ҳаво кучларининг иккита F-16 самолёти «ҳаво ҳолатини кузатиш учун» ҳавога кўтарилган. «Ушбу воқеалар давомида радар кузатув тизими мамлакат ҳаво ҳудудига кириб, Украина йўналиши бўйича ўз ҳудудини тарк этган дроннинг парвоз йўлини аниқлади ва кузатди», — дейилади хабарда.

Руминиялик депутатлар Patriot'ни Украинага беришни маъқуллади

Руминия парламентининг қуйи палатаси 3 сентябр куни Patriot зенит-ракета комплексини Украинага беғараз топширишга рухсат берувчи қонунни қабул қилди, деб хабар берди Reuters агентлиги. «Президент Клаус Йоханнис қонунни имзолаши биланоқ ҳукумат топшириш тўғрисида буйруқ чиқаради», — дейилади баёнотда. Руминия ҳукумати бир кун аввал Patriot ЗРКни Украинага ўтказишни маъқуллади ва қарорни тасдиқлаш учун парламент қуйи палатасига тақдим этди. 

Июн ойида Бухарест Украинага иккита Patriot тизимидан бирини иттифоқчилар уни кейинчалик худди шундай ҳаво ҳужумига қарши мудофаа тизими билан алмаштириши шарти билан беришини маълум қилди. Умуман олганда, ўзини Россиядан ҳимоя қилаётган мамлакатга НАТОга аъзо мамлакатлардан бешта стратегик ҳаво мудофаа тизими ваъда қилинган. Бу ҳақда июл ойида НАТОнинг Вашингтондаги саммитида келишувга эришилган эди. Учта Patriot ЗРК Германия томонидан Украинага топширилди, ваъда қилинган жараённинг охиргиси 21 июл куни бўлиб ўтди. 

НАТО Украинага ёрдамни оширмоқда 

Россиянинг Украина ҳудудига қилган оммавий ҳужумларидан сўнг Шимолий Атлантика алянси Киевни қўллаб-қувватлашни кучайтиришга тайёр. Бу ҳақда 28 август куни НАТО-Украина кенгаши йиғилишидан сўнг унинг бош котиби Йенс Столтенберг маълум қилди.

«Иттифоқчилар Украинага ҳарбий ёрдамни ошираётганини тасдиқладилар, - деди у. - Украинани Россиядан ҳимоя қилиш учун зарур бўлган жиҳозлар ва ўқ-дорилар билан таъминлашда давом этишимиз керак». Шу билан бирга, алянс раҳбари Киевга ҳарбий юкларни кўпайтириш мамлакат мудофаасини таъминлашнинг асосий шарти эканини таъкидлади.