Португалияда ўрмон ёнғинлари туфайли фавқулодда ҳолат эълон қилинди

Португалия шимолида юз бераётган ўрмон ёнғинлари назоратдан чиқиб кетди, ҳодиса оқибатида ҳалок бўлганлар сони етти кишига етди, деб хабар беради Associated Press.

Фото: AP Photo

Мамлакат бош вазири Луиш Монтенегро ёнғин содир бўлаётган ўрмонларга яқин ҳудудларда фавқулодда ҳолат эълон қилиб, кўпроқ ўт ўчирувчилар ва давлат хизматчиларини ёнғинни ўчиришга сафарбар этишни буюрди. Шунингдек, у полиция терговчиларини ёнғиннинг юзага келишида айбдорларни қидиришни кучайтиришга чақириб, уйидан айрилган ёки эвакуация қилинган фуқароларга ёрдам ваъда қилди.

«Оғир дамлар тугамаганини яхши тушуниб турибмиз. Одамлар ва мулкларни ҳимоя қилиш учун шерикларимиз ҳамда дўстларимиздан ёрдам сўрашимиз даркор», — дейди Монтенегро.

Copernicus Европа сунъий йўлдош хизматининг маълум қилишича, 15 минг гектардан ортиқ ўрмон ёниб кетган, умумий ҳисобда 13 километр аланга фронти аниқланган. Шунингдек, 210 минг киши истиқомат қиладиган туман ёнғин хавфи остида қолмоқда.

Қуруқ ва иссиқ об-ҳаво туфайли Португалияда авж олган ўрмон ёнғинлари Марказий Европада юз бераётган сув тошқинларига тўғри келди. Европа Иттифоқи бир-бирига зид бўлган экстремал об-ҳаво «иқлим ўзгаришининг» исботи бўла олишини маълум қилди.

Испания Қуролли кучлари ёнғинга қарши курашиш учун қўшни мамлакатга 240 нафар аскар ва транспорт воситасини юборган. Франция эса сув ташувчи тўртта самолёт жўнатган, Марокаш ҳам Португалияда иккита самолёт хизматини тақдим этган.

#Португалия #ўрмон ёнғинлари