Социалист Сегуру Португалия президенти этиб сайланди

Сўлларга яқин Социалистик партия (PS) номзоди Антониу Жозе Сегуру ўта ўнг Chega (“Етар!”) партияси номзоди Андре Вентурадан ўзиб кетиб, президент сайловининг иккинчи турида ғалаба қозонди. Португалия давлат компанияси RTP (“Португалия радио ва телевидениеси”) ҳукумат ҳисоб-китобларига таяниб, душанбага ўтар кечаси, 9 февралда шундай хабар берди.

63 ёшли Сегуру 66,8 фоиз овоз олган, унинг 43 ёшли рақиби эса қарийб 33,2 фоиз тўплаган.

Вентура мағлубиятни тан олиб, Сегуруга “ажойиб муддат” тилади. Шу билан бирга, президентликка номзод ўз партияси Португалияда “туб ўзгаришлар” учун курашни давом эттиришини айтди. У, шунингдек, яқин орада Chega вакиллари “бу мамлакатни бошқаради” дея ишонч билдирди.

Сегуруни сайловдаги ғалабаси билан ўнг марказга яқин Социал-демократик партия (PSD) раҳбари бўлган бош вазир Луиш Монтенегру табриклади. Dpa агентлиги қайд этишича, ҳукумат раҳбари келажакдаги президент билан яхши ҳамкорликка умид билдирган.

2016 йилдан бери икки муддат кетма-кет Португалия президенти бўлиб келган Марселу Ребелу де Соуза (у ҳам PSD вакили)ҳокимиятни топшириши 9 мартга режалаштирилган. PS вакили 2006 йилдан бери биринчи марта давлат раҳбари бўлади: ўша йили социалист Жоржи Фернанду Бранку де Сампайюнинг кетма-кет иккинчи президентлик муддати якунланган эди.

Португалияда президент сайловининг биринчи тури 18 январ куни ўтган. Унинг якунларига кўра, 1986 йилдан бери илк бор номзодлардан ҳеч бири 50 фоиздан ортиқ овоз олмаган: Сегуру 31,1 фоиз овоз тўплаган, Вентура эса 23,5 фоиз олган. Португалиядаги сиёсий беқарорлик даврининг яна бир белгиси — сўнгги уч йил ичида мамлакатда парламент сайловлари уч марта ўтказилгани.

Шу билан бирга, Сегурунинг сиёсий вазиятни ўзгартириш имкониятлари кўп эмас, чунки мамлакатда президент асосан вакиллик (рамзий) вазифаларни бажаради. Бироқ у парламент қабул қилган қонунларга вето қўйиши ва айрим истисно ҳолларда парламентни тарқатиб, муддатидан олдинги сайловлар тайинлаши мумкин. Ребелу де Соуза бу имкониятдан икки марта фойдаланган: 2023 йил ноябрда ва 2025 йил мартда.