Украинада эркак организмидан олтита гайка калити чиқариб олинди

Украинанинг Черкаси областида шифокорлар эркакнинг организмидан у ютиб юборган олтита гайка калитини чиқариб олди. Бу ҳақда област шифохонасининг кўкрак қафаси жарроҳлик бўлими вакиллари Facebook’да маълум қилди.

Хабарга кўра, ғайритабиий ҳодиса ўтган ойда юз берган. Бемор бўйин флегмонаси, қизилўнгачнинг ҳалқум ва ўрта учдан бир қисмида йиртилиш, тўлиқ медиастинит, ўнг томонда плевра эмпиемаси, ёт жисмлар ва ошқозон тушиши ташхислари билан касалхонага ётқизилган.

Шифокорлар, шунингдек, асбоблар кўриниб турган рентген фотосуратларини ҳам эълон қилди. Эркак уларни нима сабабдан ютиб юборгани ҳозирча номаълум.

Жарроҳлик амалиёти бир вақтнинг ўзида беморнинг бир нечта органларида амалга оширилган. Уч ҳафталик даволанишдан сўнг у шифохонадан чиқарилди.

Аввалроқ Эронда шифокорлар эркакнинг ошқозонидан умумий оғирлиги уч килограммга яқин 452 та майда металл буюмларни олиб ташлаганди.

Беморга психоз ташхиси қўйилди. Руҳий бузилиш кучайганида буюмларни эркакнинг ўзи ютиб юборган— у уч ой давомида металл “еган”.