Чирчиқ дарёсининг 6 км қисмида дам олиш ҳудуди барпо этилади

Бухоро шаҳри чеккасида Бухоро давлат университети учун янги кампус қурилади. Хива шаҳридаги темирйўл вокзали ёнида йўл ўтказгич барпо этилади. Президентга ижтимоий ва иқтисодий лойиҳалар ҳақида ахборот берилди.

Президент Шавкат Мирзиёев 26 сентябр куни қурилиш, таълим, туризм ва саноат соҳаларидаги лойиҳалар тақдимоти билан танишди.

Йиғилишда қайд қилинишича, Чирчиқ дарёсининг 6 километрга яқин қисмида дам олиш ҳудуди барпо этилади. Бунинг учун қирғоқлар тартибга келтирилиб, кўкаламзорлаштирилади. Меҳмонхона, соғломлаштириш ва кўнгилочар масканлар қурилади.

ЮНЕСКО Бош конференциясининг 43-сессияси 2025 йилда Самарқанд шаҳрида ўтказилади. Тақдимотда ушбу тадбирга тайёргарлик ҳамда режалар тўғрисида ахборот берилди. Хусусан, Маданият ва санъатни ривожлантириш жамғармаси, ЮНЕСКО ишлари бўйича Ўзбекистон Республикаси Миллий комиссияси ва бошқа ташкилотлар ҳамкорлигида Самарқанд шаҳридаги маданий мерос объектларини асраш, улар бўйлаб саёҳатлар ва кўргазмалар ташкил этиш чоралари кўрилаётгани таъкидланди.

Бухоро шаҳрининг чеккасида Бухоро давлат университети учун янги кампус қуриш режалаштирилмоқда. 43 гектарда лойиҳалаштирилаётган мажмуада барча факултетлар, маъмурият, ётоқхоналар, лабораториялар, кутубхона, стадион, спорт зали ва амфитеатр жойлашади. Дарс ва амалиёт учун замонавий шароитлар яратилади. Ётоқхона ўрни 3 мингтадан 6 мингтага ошади. Бўш майдонларга дарахт экилиб, боғ барпо этилади.

Хива шаҳридаги темирйўл вокзали ёнида йўл ўтказгич барпо этиш мўлжалланмоқда. Лойиҳага кўра, 450 метрлик бу йўл транспортлар қатновини алоҳида ташкил этиш имконини беради, вокзал ва Ичан қалъа ўртасида пиёдалар хавфсиз ҳаракатланади.

Давлат раҳбари лойиҳаларни такомиллаштириш, амалдаги ишларнинг сифатини ошириш бўйича кўрсатмалар берди.

#Бухоро #Хива #Туризм