Австриядаги сайловларда ўнг популистлар ғалаба қозонди

Австрияда парламент сайловларида овоз бериш 29 сентябр, якшанба куни якунланди. Норасмий дастлабки натижаларга кўра, Херберт Кикл бошчилигидаги ўнг популист Австрия Озодлик партияси 29 фоиздан ортиқ овоз билан ғалаба қозонади.

Foresight социологик институти маълумотларига кўра, канцлер Карл Нехаммер бошчилигидаги ҳукмрон консерватив Австрия Халқ партияси 26 фоизга яқин овоз олган. Австрия Социал-демократик партиясини сайловчиларнинг тахминан 20 фоизи, «Янги Австрия ва Либерал форум» партияси ҳамда «яшиллар»ни 9 фоиздан камроғи қўллаб-қувватлади.

Австрия Коммунистик партияси ва кабаречи Доминик Влазнининг партияси 3 фоиздан кам овоз олди. Парламент қуйи палатасига кириш учун партиялар тўрт фоизлик чегарадан ўтишлари керак.

Сайловдан олдинги сўровларда ўнг популистлар ғалабаси тахмин қилинган

Ўнг популистлар бир йилдан кўпроқ вақт давомида сўровларда етакчиликни сақлаб келди. Ундан кейинги ўринлардан Австрия Халқ партияси ва социал-демократлар жой олди. Ҳозирда ҳукумат таркибига кирган «яшиллар» ва «Янги Австрия ва Либерал форум» партияси тўртинчи ўрин учун курашди.

Июнь ойида бўлиб ўтган Европарламент сайловларида Австрия Озодлик партияси 25,5 фоиз овоз билан Австрияда ғалаба қозонди. Халқ партияси ўшанда 24,7 фоиз, социал-демократлар эса 23,3 фоиз овоз олди.