Италияда Украинани қайта тиклаш бўйича конференция бўлиб ўтади

«Украина ёлғиз эмас ва биз уни керак бўлгунича қўллаб-қувватлаймиз», деди Италия бош вазири Жоржа Мелони. Украинани қайта тиклаш конференцияси 2025 йилнинг 10-11 июл кунларига белгиланган.

Фото: Andrew Medichini/AP/dpa/picture alliance

2025 йилда Украинани тиклаш бўйича конференция Италияда бўлиб ўтади. Бу ҳақда 10 октябр, пайшанба куни Римда Украина президенти Володимир Зеленский билан учрашувдан сўнг бош вазир Жоржа Мелони маълум қилди. Унинг сўзларига кўра, тадбир 10-11 июл кунларига мўлжалланган.

«Украина ёлғиз эмас ва биз уни керак бўлгунича қўллаб-қувватлаймиз», — дея Мелони сўзларини келтиради AFP. Унга кўра, Италиянинг қўллаб-қувватлаши Киевга «таслим бўлиш варианти бўлмайдиган тинчлик учун музокараларни бошлашда энг яхши имконият» бериши керак.

Аввалроқ, Украинани тиклаш бўйича шунга ўхшаш конференциялар Лондонда (2023 йил 21-22 июн) ва Берлинда (2024 йил 11-12 июн) бўлиб ўтган. 2024 йил 15-16 июн кунлари Швейцариянинг Бюргенсток курорт шаҳрида Украина бўйича тинчлик конференцияси ҳам ўтказилди.

Володимир Зеленскийнинг Европага сафари

Римга боришдан олдин Володимир Зеленский Лондонга ташриф буюрди, у ерда Буюк Британия бош вазири Кир Стармер билан, Парижда эса Франция президенти Эммануэл Maкрон билан музокаралар ўтказди. Зеленский унинг Европа пойтахтларига сафари Россия билан эҳтимолий сулҳ шартларини муҳокама қилиш ниятига боғлиқлиги ҳақидаги маълумотни рад этди. «Мен баъзи оммавий ахборот воситаларида сулҳ ҳақида гапириш учун келганим ёзилганини кўрдим, бу ёлғон маълумот», деди Украина президенти Макрон билан учрашувдан кейин. Зеленскийнинг фикрича, бундай миш-мишларнинг тарқалиши ортида Россия турибди.

Шу билан бирга, у иттифоқчиларни Украинага ёрдам беришни давом эттиришга чақирди: «Бизга қишгача ёрдам керак».

11 октябр куни эрталаб Зеленский Ватиканда Рим папаси Франциск билан учрашиши кутилмоқда. Куннинг иккинчи ярмида у Берлинда Германия канцлери Олаф Шолц билан кўришиши режалаштирилган.