Тошкентда мушукка бешафқатлик қилган ўқитувчи ишдан бўшади

Мушукни деразадан улоқтирган ва ўлимига сабаб бўлган ўқитувчи маъмурий жавобгарликка тортилди, сўнгра ўз аризасига биноан ишдан бўшади.

Фото: Мушуккент

Тошкент шаҳри, Учтепа туманидаги 62-мактаб ўқитувчиси мушукка бешафқатлик қилгани ҳақидаги хабарлар Тошкент шаҳри мактабгача ва мактаб таълими бошқармаси томонидан ўрганилди.

Қайд қилинишича, мактаб директори Ш. Н. жамоада назоратни сусайтирганлиги, ўз хизмат вазифасига масъулиятсизлик билан ёндашганлиги учун бошқарма бошлиғи буйруғи билан ҳайфсан интизомий жазосига тортилган.

Воқеага дахлдор бўлган ўқитувчи Д.Х. Ички ишлар органлари томонидан Маъмурий жавобгарлик тўғрисидаги кодексининг 111-моддаси (Ҳайвонларга нисбатан шафқатсиз муносабатда бўлиш) 1-қисмига асосан жавобгарликка тортилган ва ўз аризасига биноан эгаллаб турган вазифасидан озод этилган.

Мушук билан боғлиқ ҳодиса 27 сентябр куни содир бўлган. 62-мактабнинг ўзбек тили ўқитувчиси мушукни ўқувчилари кўз ўнгида иккинчи қават деразасидан улоқтирган, оқибатда жонивор тан жароҳатлари олиб, нобуд бўлган эди.