ГФР ва АҚШ Киевни НАТОга зудлик билан таклиф қилишга тайёр эмас

Германия ва АҚШ ҳали Украинани НАТОга «дарҳол таклиф қилишга» тайёр эмас. Бу ҳақда 23 октябр, чоршанба куни АҚШ ва Шимолий Атлантика алянсининг тўрт нафар расмий ва дипломатларига таяниб, Politico нашри маълум қилди.

Politico Украина президенти Володимир Зеленскийнинг «ғалаба режаси»да «зудлик билан таклиф» ҳақида гап кетганини эслатиб ўтди, шу билан бирга у алянсга ҳақиқий кириш Россия Федерацияси билан уруш тугаганидан кейингина мумкин бўлишини тан олди.

«Ҳозирча алянс Украинага аъзо бўлиш ёки уни таклиф қилишга тайёр бўладиган даражага етгани йўқ», деди АҚШнинг НАТОдаги доимий вакили Жулианна Смит.

Зеленский: Украина ядро қуролини қайтаришни сўрамаяпти, лекин НАТОга қўшилиши керак

Украина ядро қуролини қайтаришни сўрамаяпти, лекин Россия агрессиясидан ўзини ҳимоя қила олиш учун НАТОга қўшилиши керак. Бу ҳақда Украина президенти Володимир Зеленский АҚШ мудофаа вазири Ллойд Остин билан музокаралар якунлари бўйича журналистларга маълум қилди.

Зеленскийнинг таъкидлашича, Украина кўп йиллар аввал НАТОга аъзо бўлишга умид қилиб, бутун ядро арсеналидан воз кечган.

«Биз ўз вақтида барча ядровий қуролларимиздан воз кечдик. Бу кўп йиллар олдин бўлганди. Биз НАТОга киришимиз керак эди. Бу менинг фикрим. Мен буни (АҚШ президенти Жо) Байден ва (Республикачилардан президентликка номзод) Трамп билан бўлишдим. Шунинг учун мен Украинага нисбатан адолат қаердалигини тушуна олмаслигимни айтдим», — дея Зеленскийнинг сўзларидан иқтибос келтирган РБК-Украина.

Унинг таъкидлашича, Украина қуроллардан воз кечган, аммо ваъда қилинган хавфсизликни олмаган.

«Биз ядро қуролидан воз кечдик, лекин НАТОни олмадик. Ва сиз менга бошқа иттифоқчилар ёки бошқа «хавфсизлик соябонлари» ёки шунга ўхшаш нарсаларни айтиб бера оласизми, деб сўрадим. Ҳеч ким Украина учун НАТОга мос келадиган хавфсизлик чоралари ва кафолатлари ҳақида менга айтолмади. Шунинг учун бу менинг далилларим», — деди Зеленский.