Флоренция «ҳаддан зиёд туризм»га қарши кураш бўйича янги чоралар қабул қилди

Флоренция расмийлари 12 ноябр куни Италия ҳукумати «Катта еттилик»га аъзо давлатларнинг туризм вазирларини қабул қилган бир пайтда «ҳаддан зиёд тузим»га қарши кураш бўйича янги чора-тадбирларни қабул қилди, деб хабар беради ABC News.

Қайд этилишича, мэр Сара Фунаро кабинети 10 та банддан иборат режани маъқуллаган. Улардан бирига кўра, экскурсия гидларига Флоренция тарихий марказида овоз кучайтиргичлардан фойдаланиш тақиқланмоқда.

Бундан ташқари, шаҳар маъмурияти квартираларини ижарага бериш вақтида бино деворига калит учун мўлжалланган қутиларни ўрнатаётган уй эгаларига қарши курашиш ниятида. Ҳукуматнинг фикрича, бу каби мосламаларнинг ўрнатилиши шаҳарнинг тарихий кўринишини бузмоқда.

ISTAT Миллий статистика бюроси маълумотларига кўра, 2023 йилда Италияга ўз тарихидаги энг кўп турист ташриф буюрган: 134 миллион киши келган, 451 миллион одам эса меҳмонхоналар ёки бошқа турар жойларда тўхтаб ўтган.

Меҳмонхонадан ташқари масканларда қолишни танлаган ташриф буюрувчилар сони 2022 йил билан таққослаганда 17 фоизга ошган.

Италия БМТнинг Жаҳон сайёҳлик барометри рейтингида халқаро туристик йўналишлар бўйича Франция, Испания ва АҚШдан кейин тўртинчи ўринни эгаллайди. Statista тадқиқотларида келтирилишича, 2023 йилда туристик соҳанинг Италия ЯИМдаги улуши 10,5 фоизни ташкил этган.