Тошкентда яна “снос” масаласи: одамлар ваъда қилинган уйларни ололмаяпти

Шу йил Мирзо Улуғбек тумани Темур Малик кўчасидаги кўприк реконструкция қилиниб, йўл кенгайтирилган, шунинг ҳисобига атрофдаги ҳовлилар бузилган эди. Бунинг учун мулкдорларга компенcация пуллари тўлиқ ёки қисман берилган. Хусусан, май ойида 50 га яқин фуқарога янги кўп қаватли уйлардан хонадон ажратилиши белгиланган. Лекин уйлар битган бўлса-да, одамлар ваъда қилинган хонадонларни ололмаяпти.

2024 йилнинг август ойида пойтахтнинг Мирзо Улуғбек тумани Темур Малик кўчаси бўйлаб янги йўл ўтказгич фойдаланишга топширилган эди. Кўчанинг ҳозирги қиёфасига қаралса, фуқаролар учун кўплаб қулайликлар яратилган, йўл олдингидан кенгайган. Бу кенгайтириш учун йўл бўйида жойлашган ўнлаб кишиларнинг уйлари компенcация эвазига жамоат эҳтиёжлари учун олиниб, бузилган.

Ўшанда мутасаддилар компенcация маблағларини мулкдорларга тўлиқ ёки қисман берган. Шунингдек, расмий келишувларга асосан, 50 га яқин кишига май ойида собиқ МИБ ҳудудида қуриб фойдаланишга топшириладиган кўп қаватли уйлардан хонадон ажратилиши белгиланган. Орадан роппа-роса 6 ой ўтди. Уй ҳам битди. Аммо хонадонлар эгаларига топширилмади.

Муаммоси ҳал этилмаётган бир гуруҳ фуқаролар Kun.uz'ga мурожаат қилди.

“Аҳоли рози бўлиб, мана шу жойларда участкалар бузилди. Бундан олдин, Тошкент шаҳар ҳокимлиги томонидан комиссия тузилган эди. Комиссия ҳар бир хонадонга кирди. Биз билан шартнома тузгач, уйлар бузишга тайёрланди. Кафолат хатлари берилди, уйлар баҳоланди. Кимдир ярмини, кимдир ҳаммасини берди. Мутасаддилар кафолат хати орқали янги кўп қаватли уйлардан хонадонлар берилишини аштишди. Бунда кимгадир икки хонали, кимгадир уч хонали хонадон ваъда қилинган. Шу кунгача биз бу уйни кутиб яшадик. Қурувчи ташкилот ҳокимият билан шартнома тузмагани, шунинг учун уй бера олмаслигини айтяпти”, дейди Шавкат Йўлдошев.

Ҳозирда фуқароларга ваъда берилган хонадонлар вақтида топширилмаслиги ортидан турли ноқулайликлар келиб чиқмоқда.

“Янги кўприкларимиз яхши ва чиройли бўлди, баланд девор қурилди, лекин деворлар орқасидаги шароитлар жуда ёмон ҳолатда. Шуларни яхшиласа бўларди. Масалан, бир хил одамлар шароит ва канализация бўлмагани учун уйларини ташлаб, квартира олиб кетишди. Бир хил одамлар эса ярим ҳовлисида қолиб, ҳозирги кунгача ёмон шароитда яшаб келмоқда. Бизда ҳам худди шунақа аҳвол. Бир ўғлим билан мен эски ҳовлимизда қолганман, битта ўғлимни квартирага чиқарганман. Энди ўша ўғлимга мана шу икки хонали квартира олиб беришим керак эди”, дейди Мирҳосил Фозилов.

Комила Жумаева етти ойдан бери кўчада сарсон-саргардонлигини билдирди. Унга кўра, ҳокимият томонидан ижарада яшаб туришлари учун икки марта ёрдам пули берилган. Кейин уларга ҳеч қандай ёрдам берилмаган.

“Иложи бўлса, тезроқ ёрдам бериб, уйимизни ҳал қилишимизга ёрдам берса. Жуда ҳам қийналяпман. Квартирада яшаш азоб экан, ёлғизман. Темур Малик кўчаси, 78-уйда турардим, янги “дом”нинг “Г” блокидан 1 хонали, 5-қават, 28-хонадонни беришди. Кафолат хати ҳам шунақа деб ёзилган, лекин ҳеч натижа йўқ”, дейди Комила Жумаева

Мулкдорларга кўра, мутасаддиларга қилинган мурожаатларга тайинли жавоб берилмаган.

“Муаммоларимизни ҳеч ким ҳал қилиб бера олмаяпти. Мирзо Улуғбек туман ҳокимиятига, шаҳар ҳокимиятига ва ҳатто президент қабулхоналарига ҳам бир неча марта бордим, лекин натижа бўлмади. Ўтган пайшанба куни Вазирлар Маҳкамасигача бориб келдим.

Қурувчи ва ҳокимият томонидан муаммо сабаблари тушунтирилмаяпти. Одамлар сарсон, мен ота-онам билан вақтинчалик квартирада тураман”, дейди Заҳро Ҳамидова

Қурувчи ташкилот вакилининг айтишича, туман ҳокимияти мазкур кўп қаватли уйни бунёд этиш учун маълум миқдордаги пул маблағини ажратган. Лекин кейин молиялаштириш тўхтаб қолган. Қурувчи эса ўз ҳисобидан қурилишни давом эттирган.

“Бузилишга тушган фуқаролар рўйхатини Тошкент шаҳар ҳокимлиги бериб, жами 47 нафар фуқаро учун 116 та хонадонни буюртма қилган. Бунинг учун уларга маълум миқдорда пул маблағи таклиф этганмиз, шундан ҳозиргача бир қисми берилган. Шундан бери ҳокимият бизга жавоб қайтармади. Уларга қолган пул маблағини беринг, кейин хонадонларни эгаларига топширамиз демоқчимасмиз, фақатгина биз билан шартномасини якунласин, биз хонадонларни тайёрлаб қўйганмиз, улар сотилмай турибди.

2-3 ҳафта олдин шаҳар ҳокимиятига бориб келдим, ҳоким ёрдамчиси билан учрашдим, унга хонадонлар бўйича тегишли маълумот ва ҳужжатларни тақдим этдим, Улардан ҳалигача бирон жавоб келмади”, дейди қурувчи ташкилот вакили.

Тошкент шаҳар ҳокимлиги матбуот хизмати ходими Kun.uz билан суҳбатда қурилиш ишларини Автомобил йўллари қўмитаси олиб боргани, айни пайтда тўлиқ тушунтириш бера олмаслигини маълум қилди.

Kun.uz воқеалар ривожини кузатиб боради.