Инқироз давридаги «Манчестер Сити»ни олдинги турларда «Арсенал» ва «Челси»дан гол ўтказмаган Шон Дайч номидаги метин ҳимояга қарши қийин ўйин кутаётганди. Аммо Boxing Day’да Хосеп Гвардиола жамоаси Лондоннинг икки клуби қила олмаган ишни уддалади. Мезбонлар тезкор гол билан ҳисобни очишди, Пикфорд Бернарду Силванинг зарбасини қайтариши мумкин эди, аммо тўп «Эвертон» ҳимоячисининг оёғига теккан ҳолда йўналишини ўзгартириб, олис бурчакка бориб тушди.
Бундай сценарий эса янги интригани тақдим этарди: «ирислар» қандай гол уриши мумкин? Бу жамоада мудофаа чизиғи яхши қурилган, сўнгги олти турда фақат тўрт гол ўтказиб, фақат тўрт гол урган. Бу голларнинг барчаси «МЮ» билан ўйинда ўтказилган (0:4), тўрт гол «Вулверҳэмптон» билан ўйинда урилган (4:0), қолган тўрт ўйинда ҳисоб очилмаган. Аммо «Сити»га қарши тезда жавоб қайтарилди, Ндиайе Аканжининг хатосидан фойдаланиб, тўпни узоқ бурчакка йўналтирди. Кеейин эса Пикфорд барча зарбаларни, жумладан Ҳоланднинг пеналтисини ҳам қайтарди. Жордан АПЛда ушбу норвегиялик ҳужумчининг «нуқта»дан зарбасини тўсган илк дарвозабон бўлди ва чемпионатда саккизинчи «қуруқ» ўйинини ўтказа олмаган бўлса ҳам яна қаҳрамонга айланди. Гвардиола учун эса ҳеч қандай байрам йўқ: унинг жамоаси ҳисобда олдинда борган ўйинларда 12 очко йўқотди, бу ўтган мавсумдагидан ёмонроқ (10).
Палмер бўлмаса, ким?! «Челси» майдонда эканида бу савол риторик бўлиб янграйди. Бу сафар ҳам ёш яримҳимоячи тўпни қабул қилиб олди, бир неча ҳимоячини ортда қолдириб, рақиб жарима майдони томон юрди ва устун ёнига зарба йўллаб, тўпни дарвоза тўрига киргизди. Кейинроқ Кукурелянинг яқин масофага йўллаган зарбасини тўсган Лено у қадар қийин бўлмаган вазиятда қутқара олмади. Палмер эса АПЛдаги 50 ўйинида бундан кўпроқ голли ҳаракатлар амалга оширган - 34 гол ва 18 голли узатма, бу эса турнир тарихидаги учинчи энг яхши кўрсаткич. Ундан олдинда фақат Ҳоланд (64 балл) ва Энди Коул (57) бор. Қолаверса, у календар йилидаги голлар сони бўйича «Челси» рекордини ўрнатди, футболчи 2024 йил бошидан бери Лондон клуби учун 26 та гол урган ва 2001 йилда Жимми Флойд Ҳасселбайнк томонидан ўрнатилган рекордни (25 гол) янгилади.
Лекин кўклар сафида шу куни бошқа ҳеч ким гол урмади. Иккинчи бўлим Энцо Фернандеснинг голи билан бошланиши мумкин эди, аммо Лено тўсин остига кириб бораётган тўпни тўсишга улгурди. Кейин эса меҳмонлар тўлиқ ташаббусни қўлга олишди. Бир сафар Санчес Робинсон яқин масофадан гол уришига имкон бермади. Кейин яна бир бор қутқарди, аммо у захирадан тушган Уилсоннинг зарбаси қаршисида ожиз қолди, унга Кастаня ассистентлик қилди. Лекин бу ҳужумда асосий ишни Ивоби бажарди, у қанотдаги юриши вақтида Педру Нетуни болаларча алдаб ўтди, португалиялик яримҳимоячи эса ўзига қўполлик ишлатилганига ишонтирмоқчи бўлиб кулгига қолди.
Қўшимча дақиқалар эса — Ленонинг бенефисига айланди, у ҳисоб 1:1 ва 1:2 эканида «Фулҳэм»ни яна икки бор қутқарди. Захирадан тушган яна бир футболчи Родриго Муниз эса ғалаба голини урди. Бразилиялик ҳужумчи Англия чемпионатида 45 йилдан буён «Стэмфорд Бриж»даги ғалабани кўрмаган жамоа мухлислари учун ҳақиқий байрам уюштириб берди. Бу ғалаба Марку Силва жамоасига тўпланган очколар сони бўйича «Манчестер Сити»га тенглашиб олиш имконини берди, «Челси» эса жума кунги ўйинлар натижасига кўра иккинчи ўринни «Арсенал»га бўшатиб бериши мумкин.
«Астон Вилла» учун пайшанба кунги ўйин илк дақиқаларданоқ нохушлик билан бошланди, 2-дақиқада ҳисобни очган Гордон фаолиятида илк бор қаторасига уч ўйинда голли ҳаракат содир этди. Ўз навбатида, сўнгги вақтларда марказий ҳужумчи ўрни учун рақобатда устун келаётган ва Уоткинсдан кўпроқ ўйнаётган Дуран бирмингҳэмликларни қийин аҳволга солиб қўйди. Колумбиялик ҳужумчи Шер билан тўқнашувдан кейин инерция бўйича ҳаракатланишда давом этди ва ўз бутсасининг остки қисми билан рақибининг елкасини босиб ўтди.
Ҳакам буни қизил карточка деб топди, озчилик бўлиб қолган жамоа биринчи бўлимдаёқ таслим бўлиши мумкин эди, аммо Эмилиано Мартинес Тоналининг зарбасидан кейин навбатдаги марта ажойиб сейв амалга оширди.
Фақат ушбу аргентиналик ҳам сеҳргар эмас, у иккинчи бўлимда Бруно Гимараэс ҳимоячилар ортга ажойиб пас узатган, Мерфи эса тўпни Исакнинг оёқлари остига ташлаб берган вазиятда ҳеч нарса қила олмади. Бу тандем бироз ўтиб яна бир голни юзага келтирди, аммо швециялик ҳужумчи офсайдда қолганди. Гимараэснинг ҳам голи бекор қилинди (тўп қўл билан ўйналгани учун), аммо арбитр томонидан ўйинга қўшиб берилган дақиқаларда Жоэлинтон ҳисобни йирик кўринишга келтирди. «Нюкасл» асосий рақибга қарши амалда олти очко учун кечган баҳсда устун келди ва бешинчи ўринга чиқиб олди.
Нуну Эшпирину Санту эффекти: ҳозирданоқ «Ноттингҳем» АПЛга қайтилганидан кейинги икки мавсумдаги ғалабалардан (9 тадан) кўпроқ ғалабага эга (10). Жамоада 1995 йилдан буён ушбу турнирда қаторасига тўрт ўйинда ғалаба кузатилмаганди. Бунинг эвазига жамоа учинчи ўринга чиқиб олди, «ўрмончилар» бу ўринни камида «Арсенал»нинг жума кунги ўйини якунига қадар сақлаб қолади. Ўз наватида, Эланганинг голи туфайли мағлуб бўлган «Тоттенҳэм» узил-кесил турнир жадвалининг иккинчи қисмида ўрнашиб қолди, ўйинни қутқариш мумкин бўлган дақиқаларда эса Спенс иккинчи бор сариқ карточка олиб, жамоанинг имкониятини кескин камайтириб юборди. «Шпорлар» анчадан буён мухлисларини Boxing Day’да ютқазмасликка ўргатиб қўйганди. Бу мағлубият — 2003 йилдан буён биринчиси. Ва буни тасодиф деб бўлмайди, чунки Ангелос Постекоглу жамоаси жорий мавсумда аллақачон тўққиз марта ютқазиб бўлди. Бундан кўпроқ мағлубият «Вулверҳэмптон» (11) ва «Саутҳемптон» (14) каби аутсайдерларда кузатилган.
Вулверҳэмптондаги ўйин — португалиялик мутахассислар дуэли бўлди. Рубен Аморим ватанида «Спортинг» билан икки бор чемпионликни қўлга киритган. «Бўрилар»ни қутқариш учун чақирилган Витор Перейра ўтган ўн йиллик бошларида «Порту» билан икки бор чемпион бўлган, кейин Греция, Саудия Арабистони, Хитой ва Бразилия чемпионатларида ишлаган. У жамоага тайинлангани ҳақида 19 декабр куни эълон қилинганди, уч кун ўтиб «Вулверҳэмптон» «Лестер»ни йирик ҳисобда таслим этди (3:0).
Ўйиннинг биринчи бўлимида жамоалар максимал даражада зич даражада ўйнади ва ёдда қоларли воқеалар кам бўлди. Мезбонлар ҳисобни очиши мумкин эди, Онана Странд-Ларсеннинг газонга сапчиб келган мураккаб зарбасини амаллаб бартараф этди. Жозе Са эса Лисандро Мартинеснинг ҳужумидан кейин тўпни осонлик билан эгаллаб олди. Иккинчи бўлим «МЮ» мухлислари учун шок ҳолат билан бошланди — Бруну Фернандеш чемпионат бошидан буён иккинчи бор майдондан четлатилди, у рақибнинг оёғини босиб олди ва унга иккинчи сариқ карточка кўрсатилди. Португалиялик яримҳимоячи учун бу жорий мавсумда барча турнирлар доирасидаги учинчи четлатилиш — бунақаси охирги бор 2008/09 йиллар мавсумида Неманя Видич билан содир бўлганди.
Аммо бу ҳали ҳаммаси эмасди. Лига кубоги доирасида «Тоттенҳэм»га қарши ўйинда бўлгани каби «қизил иблислар» бурчакдан тўғридан тўғри йўлланган зарбани ўтказиб юборди. Сон Хин Миннинг голи Матеус Куня ижросида такрорланди.
Меҳмонлар бунга қарши жавоб бера олмади, қўшимча дақиқаларда эса қарши ҳужумдан гол ўтказиб юборди, биринич гол муаллифи яккама-якка вазиятга чиқиб бориб, тўпни жамоадоши Ҳванг Ҳи Чҳангдан қизғонмади. «Бўрилар» хавфли зонани тарк этишди, «МЮ» эса дербидаги шов-шувли ғалабадан кейинги уч ўйинда ютқазди ва ҳамон ўн тўртинчи ўринда қолмоқда. Қолаверса, Аморим АПЛнинг етти турида 4 бор ютқазди, Эрик тен Ҳагда ҳам стартдаги тўққиз ўйинда шунча мағлубият бўлганди.
Кун давомидаги ўйинлар натижалари «Ливерпул» учун идеал кўриниш олди, аммо ўйин кунини якунлаб берган қизиллар ҳам қийинчиликка учрашди. Айю Робертсонни доғда қолдириб, тезкор гол урди. Шундан кейин «Лестер» туманга бурканган «Энфилд»да классик автобус қўйди. Мезбонлар фақат биринчи бўлимга қўшиб берилган дақиқаларда бу ҳимоя деворини ёриб ўтишди, аввалига Салоҳнинг зарбасидан кейин тўп тўсинга тегди, аммо Гакпо идеал зарбаси билан тўпни олис бурчакка аниқ йўналтирди.
«Лестер» доимий босим остида тўлиқиб қолди ва мерсисайдлик футболчиларга етолмай қолганди ва танаффус «тулкилар»га ўзига келиш учун имкон бўлиши мумкин эди. Иккинчи бўлим эса узоқ давом этган ҳужум билан бошланди ва бу ҳужумга Мак Аллистернинг узатмасини голга айлантирган Жонс якун ясади. Ўйин охирида эса Салоҳ ҳам ўз номини таблога ёздириб қўйди. Мисрлик ҳужумчи АПЛ уй ўйинлари доирасидаги юзинчи голини нишонлади, шундан фақат иккитаси «Челси» сафида урилган. Қолаверса, у чемпионатнинг жорий мавсумида қаторасига ўн ўйинда голли ҳаракат содир этмоқда (12+7). Бундан ташқари, у амалда фаолиятини давом эттираётган футболчилар орасида Boxing day ўйинларидаги энг сермаҳсул футболчи (7+4).
Қизиллар мухлислари учун асосий совға эса — энг яқин таъқибчи «Челси»дан 7 очкога ўзиб кетилгани бўлди. Бугун «Ипсвич»га қарши ўйнайдиган «Арсенал»да фарқни олти очкогача қисқартириш имконияти бўлади, аммо қизиллар захирасида «Эвертон»га қарши қолдирилган ўйин ҳам бор.
Кун статистикаси
«Манчестер Сити» сўнгги ўн уч ўйинида фақат 1 марта дарвозаси дахлсизлигини сақлаб қололган.
Витор Перейра «Вулверҳэмптон» билан дастлабки икки ўйинида ғалаба қозонган 1-мутахассис бўлди.
«Челси» 25 йил мобайнида чемпионатда 82-дақиқага қадар ҳисобда олдинда борган ўйинларида ютқазмаганди. 1999 октябрида кўклар жамоаси «Арсенал» билан дербида шундай шок ҳолатини бошдан кечирганди (2:3).
«Манчестер Сити» йил бошидан буён 62 гол ўтказиб юборди. Бу «шаҳарликлар» учун сўнгги тўққиз йилдаги энг ёмон кўрсаткич.
«Ливерпул» ҳужумчиси Салоҳ АПЛ уй ўйинларида 100 гол уриши учун 142 ўйин талаб этилди. Бундай кўрсаткичга ундан тезроқ фақат Алан Ширер (91), Тиерри Анри (113) ва Серхио Агуэро (125) эришган.
