NBC: Мексика АҚШ ҳарбий самолёти қўнишига рухсат бермади

Ҳаво кемаси бортида Қўшма Штатлардан депортация қилинган ноқонуний мигрантлар бўлган. Мексика ҳукуматининг ушбу ҳаракати Трамп администрациясининг мигрантларни депортация қилиш режасини вақтинча барбод қилди.

Фото: Getty Images

Мексика 23 январ куни Америка ҳарбий самолётининг қўнишига рухсат бермади. Бу ҳақда NBC телеканали маълум қилди.

Қайд этилишича, Мексика ҳукуматининг ушбу ҳаракати АҚШ администрациясининг ноқонуний мигрантларни депортация қилиш режасини вақтинча барбод қилган.

Манбаларга кўра, Ҳарбий-ҳаво кучларининг Гватемалага йўл олган иккита C-17 самолёти бортида АҚШдан депортация қилинган қарийб 160 киши бўлган. Мексикага учиши режалаштирилган учинчи рейс эса ҳавога кўтарилмаган. Бунга Мексика томони самолётни қабул қилишдан бош тортгани сабаб бўлган.

21 январ куни АҚШ президенти Донадл Трамп жанубий чегаралардаги инқироз туфайли умуммиллий фавқулодда вазият режимини жорий этганди. 23 январ куни Трамп ноқонуний мигрантларнинг жанубий чегаралар орқали кириб келишини тўхтатиш ва уларни чиқариб юбориш тўғрисидаги қарорни имзолаган эди.

Аввалроқ Мексика президенти Клаудия Шейнбаум АҚШ ҳудудига ўтиш учун Мексикага келган ноқонуний мигрантлар ўз мамлакатига қайтарилишини маълум қилганди. «Марказий Американинг барча давлатлари, хусусан, Гватемала билан келишув мавжуд ва ҳатто яқинда шу мақсадда учрашув бўлиб ўтди. Куба билан ҳам келишув мавжуд. Ноқонуний мигрантлар Мексика ҳудудига эмас, балки келган мамлакатига жўнатилиши керак», деган давлат раҳбари.