Белгия техник носозлик сабаб ўз ҳаво ҳудудини ёпди

Белгия ҳаво ҳудуди ва аэронавигация инфратузилмасини назорат қилишга масъул Skeyes авиадиспетчерлик компаниясининг компютер тизимида носозлик юз берди.

Қайд этилишича, шу боис маҳаллий вақт билан соат 15:00 дан 16:00 га қадар Белгия аэропортларидан бирорта ҳам борт учиб кетмаган ва бирортаси қўнишни амалга оширмаган — ҳаво кемалари бошқа мамлакатларга йўналтирилган.

«Skeyes Белгия ҳаво ҳудудини назорат қилишда фойдаланадиган ҳаво ҳаракатини бошқариш тизими тўғри ишламай қолди», — дейди Skeyes вакили Курт Вервиллиген.

Het Laatste Nieuws нашри маълумотларига кўра, носозлик Skeyes ишлайдиган компьютер тизимини янгилашга уринишдан кейин юз берган. Тизим ишдан чиққан ва диспетчерлик марказидаги барча мониторлар қора экранни кўрсата бошлаган.

Тизим соат 16:00 га яқин яна ишлай бошлаган. Белгия аэропортларидаги авиақатновлар босқичма-босқич қайта тикланмоқда. Айрим самолётлар бир неча соатга ушланиб қолмоқда.

Аввалроқ American Airlines авиакомпанияси йўловчи самолёти Вашингтондаги Роналд Рейган халқаро аэропортига яқинлашаётганда ҳавода ҳарбий вертолёт билан тўқнашиб кетгани тўғрисида хабар берилганди. Самолёт бортида 60 нафар йўловчи ва тўрт нафар экипаж аъзоси, вертолётда уч нафар ҳарбий хизматчи бўлган.