Белгия Россиянинг “яширин флоти” танкерини қўлга олди

Белгия ҳарбийлари Франция кўмагида РФнинг “соядаги флоти”га тегишли, нефт ташувчи танкерини қўлга олди. Кема қалбаки ҳужжатлар билан сохта байроқ остида сузиб юрган бўлиши мумкин, деб гумон қилинмоқда.

Фото: X / FranckenTheo

Белгия “Кўк бузғунчи” операцияси доирасида Россиянинг “соя флоти”га тегишли нефт танкерини қўлга олди. “Сўнгги соатлар ичида қуролли кучларимиз Франция мудофаа вазирлиги кўмагида Россиянинг ‘соя флоти’ нефт танкерини қўлга олди”, — деб Белгия мудофаа вазири Тео Франкен якшанба, 1 март куни X ижтимоий тармоғида хабар берди. Унинг маълумотларига кўра, куч тузилмалари кемага Шимолий денгизда чиқиб олган ва уни Зебрюгге портигача кузатиб борган, у ерда кема хатловга олинган. Франкен танкер номини келтирмаган, 2 март куни батафсил маълумот беришга ваъда қилган.

Reuters агентлиги билан суҳбатда белгиялик вазир кема қалбаки ҳужжатлар билан сохта байроқ остида сузиб юрганликда гумон қилинаётганини айтди.

Белгия бош вазири Барт де Вевер мамлакат қуролли кучларини “муваффақиятли операция давомидаги профессионал ва қатъий ҳаракатлари” билан табриклади ва Францияга кўмак учун миннатдорлик билдирди. “Белгия халқаро денгиз ҳуқуқига риоя қилади ва ўз ҳудудий сувларининг хавфсизлигини таъминлайди”, — деди бош вазир “Кўк бузғунчи” операцияси ҳақида.

“Путин ўзининг ‘соя флоти’сиз Украинадаги тинч аҳолига қарши уруш олиб бора олмайди. Шунинг учун биз бу кемаларни ишдан чиқаряпмиз. Бирин-кетин. Унинг уруши тугамагунча”, — деди Тео Франкен.

“Соя флот” Россиянинг Украинага қарши уруши сабаб унга нисбатан жорий этилган ғарб санкцияларини айланиб ўтиш учун қўлланади. Бундай кемаларнинг кимга тегишли экани, одатда, маълум эмас. Шунингдек, кўп ҳолларда гап атроф-муҳит учун хавф туғдирадиган, эскирган танкерлар ҳақида кетади.

Белгия давлат медиакомпанияси RTBF маълумотига кўра, Ethera номли нефт танкери ушланган. Узунлиги 180 метр бўлган, 2008 йилда қурилган кема Гвинея байроғи остида сузган ва Ла-Манш томондан йўл олган. У Остенде соҳиллари яқинида тўхтатиб қолинган.

Белгия адлия вазири Аннелис Верлиден шундай таъкидлади: “Илк бор денгизда нефт танкери разведка маълумотлари асосида тўхтатиб қолинди — бу маълумотлар уни сохта байроқ остида сузиб юрган ва шу тариқа ‘соя флот’га тегишли кема сифатида идентификация қилган”.