Британияда Эрон фойдасига жосуслик қилган ва қамоқхонадан қочиб кетган собиқ ҳарбийга ҳукм ўқилди

Эрон фойдасига жосуслик қилишда ва Уондсворт қамоқхонасидан қочиб кетишда айбланган британиялик собиқ ҳарбий хизматчи Дениэл Халифе 14 йил ва уч ой муддатга озодликдан маҳрум этилди, деб хабар беради BBC.

Халифе махсус бўлинма ҳарбийларига оид ва бошқа маълумотларни тўплаб, Теҳронга топшириш билан шуғулланган.

Халифе Facebook орқали Эрон Ислом инқилоби муҳофизлари корпусига алоқадор инсон билан боғланган. У эронликлар билан муносабат ўрнатиб, бир сафар Лондон шимолидаги боғга қолдириб кетилган 2 минг долларни ҳам олган.

Дениэл Халифе 2019 йилда Қироллик алоқа корпуси — Британия армияснинг ёрдамчи бўлинмасида компютер мутахассиси сифатида хизмат қилган. 2021 йил августда у хизматдошларига оид махфий маълумотларни учинчи шахсларга топширганликда гумонланган. Гаров эвазига озод қилинганидан кейин аскар яна хизматга қайтган.

2023 йил январда у яна ҳибсга олинган — бу сафар ўзи хизмат қилган ҳарбий база ҳудудига бомба муляжини олиб киришга уриниш айблови билан. Олд-Бейли марказий жиноий суди, шунингдек, уни махфий маълумотлар тўғрисидаги қонунни бузишда ҳам айблаган.

Шундан сўнг, у озиқ-овқат етказиб бериш билан шуғулланувчи юк машинаси кузовида қамоқхонадан қочиб кетган. Аммо орадан кўп ўтмай полиция ходимлари томонидан ушланган.

Ҳукмни эълон қилиш бўйича эшитувлар давомида маълум бўлишича, Халифенинг қочиб кетиши полицияга 250 минг фунт стерлингдан ортиқ зарар олиб келган, уни қўлга олишда 150 нафардан ортиқ офицер иштирок этган.