Хитой АҚШ нефти, гази ва кўмирига жавоб божлари жорий этилишини эълон қилди

Хитой Америка кўмири ва суюлтирилган табиий гази импортига — 15 фоизли, нефт, қишлоқ хўжалиги техникаси ва катта ҳажмли двигателга эга автомобиллар учун эса 10 фоизли бож жорий этилишини эълон қилди.

Хитой Савдо вазирлиги баёнотида келтирилишича, шунингдек, ХХР ҳукумати Googleʼга нисбатан антимонополия қонунчилигини бузиш ҳолати бўйича тергов бошлаган.

Бундан ташқари, Пекин АҚШнинг ҳаракатлари устидан Жаҳон савдо ташкилотига шикоят қилганини билдирди. АҚШнинг бир томонлама тарифларни ошириши қоидаларни қўпол бузиш ҳисобланади. Бу ўз муаммоларини ҳал этишда нафақат самара бермайди, балки Хитой ва АҚШ ўртасидаги нормал иқтисодий ҳамда савдо ҳамкорлигига зарар етказади», — дейилади вазирлик баёнотида.

Шунингдек, Хитой волфрам, теллур, висмут, молибден ва индий билан боғлиқ товарларга нисбатан экспорт назоратини кучайтиради.

Мазкур чоралар АҚШ президенти Доналд Трамп 2 феврал куни Хитой импортига 10 фоизли божларни жорий этганига жавоб бўлди.

Трамп Мексика ва Канададан импорт қилинадиган товарларга 25 фоизлик, Хитойдан олиб кириладиган маҳсулотларга эса 10 фоизлик бож жорий этиш ҳақидаги фармонни имзолади. 2 феврал куни Канада АҚШ товарларига 25 фоизлик бож жорий этаётгани маълум бўлди. Мексика президенти ҳам жавоб чораларини кўришга топшириқ берди. Аммо кўп ўтмай ҳар икки давлат етакчилари АҚШ президенти билан божлар жорий этилишини 30 кунга кечиктиришга келишиб олди.