Британия фуқаролигини олишни истаётган америкаликлар сони рекорд даражада ошди

Юристларнинг таъкидлашича, бунга Доналд Трампнинг президентлик сайловларидаги ғалабаси ва Буюк Британия солиқ қонунчилигидаги ўзгаришлар сабаб бўлмоқда.

Фото: Shutterstock

2024 йилда 6100 нафар АҚШ фуқароси Буюк Британия фуқаролигини олишга ариза берди. Бу ҳақда мамлакат Ички ишлар вазирлигига таяниб, Financial Times хабар берди.

Қайд этилишича, ариза берганлар сони бир йил олдинги кўрсаткичдан 26 фоизга кўп ва 2000 йилдан бери кузатилган рекорд даражадаги кўрсаткич ҳисобланади. Ўтган бир йил ичида Британия ИИВга фуқаролик олиш учун жами 251 мингга яқин ариза келиб тушган — бу 2023 йилга нисбатан 6 фоизга кўп демак.

FT суҳбатлашган юристларнинг маълум қилишича, Британия фуқаролигини олишни хоҳлаётган америкаликлар сонининг ошиши Доналд Трампнинг президентлик сайловларидаги ғалабаси ва Буюк Британия солиқ қонунчилигидаги ўзгаришлар билан боғлиқ.

«Сайлов кампанияси ҳал қилувчи фазага кирганидан кейин Британия фуқаролигини олишга бўлган қизиқиш кескин ошганини қайд этдик. Ҳозирда америкаликлар Буюк Британия фуқаролигини олишга Трампнинг биринчи президентлик даврига нисбатан кўпроқ қизиқиш билдирмоқда», — дейди Farrer & Co юридик фирмаси вакили Елена Хинчин.

Феврал охирларида британияликлар 2024 йилда ЕИ таркибига кирувчи Ирландия фуқаролигини олиш учун рекорд даражада ариза бергани маълум бўлганди. Бунга мамлакат иқтисодиётидаги муаммолар, сиёсий беқарорлик, шунингдек, ЕИда иш топиш ҳамда шартнома тузишда қийинчиликлар юзага келаётгани сабаб қилиб кўрсатилган.