Путин: Россия Украинадаги вазиятда ҳеч кимга ён босмоқчи эмас

Владимир Путин Россияга Украина бўйича тарихий истиқбол учун хотиржамликни ва хавфсизлик шароитларининг барқарор ривожланишини таъминлайдиган тинчлик варианти кераклигини маълум қилди. У Россия томонидан бу масалада бирор-бир ён босиш бўлмаслигини таъкидлади.

«Биз ўзимизга мос келадиган шундай тинчлик вариантини танлашимиз керакки, у узоқ тарихий истиқболда мамлакатимиз учун тинчликни таъминласин. Бизга тинчлик ва хавфсизлик шароитида мамлакатимизнинг барқарор ривожланишини таъминлайдиган вариант керак. Бизга бировнинг ҳеч нарсаси керак эмас, аммо ўзимизникини ҳам бериб қўймаймиз», — деди Россия президенти «Ватан ҳимоячилари» фонди ходимлари билан учрашувда.

Владимир Путин ўт очишни тўхтатиш шартлари сифатида ДХР ва ЛХР ҳудудлари, Херсон ва Запороже областларидан Украина Қуролли кучларининг олиб чиқиб кетилиши, шунингдек, Украинанинг НАТОга қўшилишдан воз кечишини санаб ўтди. Россия ҳукумати ҳудудий ён босишлар имкониятини истисно этди. Шу билан бирга, Украина Европа ушбу мамлакат ҳудудига тинчликпарвар кучларни жойлаштиришни таклиф қилаётган хавфсизлик кафолатларини талаб қилади. Москва европалик тинчликпарвар кучлар тўғрисидаги ғояни рад этди.

Аввалроқ Франция, Британия ва Европанинг бошқа давлатлари ўт очишни тўхтатиш режимини таъминлаш учун Украинага қўшин юборишга тайёрлиги тўғрисида хабар берилганди. Telegraph нашри маълумотларига кўра, Лондон ва Париж Украинага камида 30 минг европалик ҳарбийни юборишни назарда тутувчи қўшма тинчликпарварлик режасини ишлаб чиққан.