Мексикада автобуслар иштирокидаги иккита ЙТҲда 25 киши ҳалок бўлди

Хусусан, Оахака штатида автобус ағдарилиб кетиши оқибатида 11 киши ҳалок бўлди ва 12 киши жароҳат олди.

Фото: Reuters

Мексиканинг Оахака ва Дуранго штатларида иккита автобус иштирокида содир бўлган йўл-транспорт ҳодисалари оқибатида камида 25 киши ҳалок бўлди, деб ёзади Reuters.

«Штат ҳукумати душанба куни эрталаб Санто-Доминго-Nарро аҳоли пунктидан 200 метр узоқликда Митла—Теуантепек шоссесида автобус ағдарилиб кетиши оқибатида 11 киши ҳалок бўлганидан афсусда», — дейилади Оахака штати хабарида.

Шунингдек, маълум қилинишича, ЙТҲ оқибатида яна 12 киши жароҳат олган ва улар шифохонага жойлаштирилган. Масъуллар авария сабабини аниқлаш мақсадида тергов ҳаракатларини олиб бормоқда.

Мамлакат шимолидаги Дуранго штатида эса 24 йўловчини олиб кетаётган автобус тиркамали шатакчи билан тўқнашиб кетган. Milenio нашрининг ёзишича, ҳодиса оқибатида ёнғин юзага келган ва 14 киши ҳалок бўлган. Автобус Мак-Аллен шаҳри (Техас штати)дан келаётган бўлган.

Эслатиб ўтамиз, 2024 йил август ойида Эронда покистонлик зиёратчиларни олиб кетаётган автобус ағдарилиб кетиши оқибатида 35 киши ҳалок бўлганди.

#автобус #ЙТҲ #Мексика