Ҳусийчилар Исроилга алоқадор кемаларга янги ҳужумлар билан таҳдид қилди

Ҳусийчилар Исроилга тегишли кемаларнинг Қизил денгиз орқали ўтишига қўйилган «тақиқ»ни тиклаш ниятида, чунки Исроил уларнинг талабига кўра Ғазо секторига инсонпарварлик ёрдами етказиб беришни тикламаган.

Фото: Khaled Abdullah / REUTERS

Яманда ҳусийчилар Исроилга Ғазо секторига гуманитар ёрдам етказиш учун берган муддат тугаганидан кейин Исроил билан боғлиқ кемаларга ҳужумларни қайта бошлаш билан таҳдид қилишди. Бу ҳақда 12 март, чоршанба куни AFP агентлиги ёзган.

Агентлик томонидан келтирилган исёнчилар баёнотида улар Қизил ва Араб денгизлари, Боб ал-Мандеб бўғози ва Адан кўрфазида «барча Исроил кемаларининг ўтишига тақиқ»ни янгилаш ниятида экани айтилади.

Сулҳ вақтида кемаларга ҳужумлар тўхташи

Январ ойи охирида ҳусийчилар Қизил денгиздаги кемаларга ҳужумларни Ғазо секторидаги ўт очишни тўхтатиш муддати давомида чеклашларини эълон қилишди. АҚШ, Миср ва Қатар воситачилигида тузилган олти ҳафталик оташкесим 19 январдан кучга кирди. Бироқ, Исроил ва Ҳамас ташкилоти кейинги ҳаракатлар бўйича келиша олмаяпти, деб эслатади AFP.

Бир ҳафтадан кўпроқ вақт олдин Исроил Ғазо секторига инсонпарварлик ёрдами ва кейинроқ электр энергияси етказиб беришни тўхтатди. Исроил бош вазири Бинямин Нетаняҳунинг айтишича, қаттиқ ёндашув Ҳамасни ўт очишни тўхтатишнинг иккинчи босқичи бўйича ўз шартларини қабул қилишга кўндириш учун мўлжалланган.

Ўз навбатида, ҳусийчилар 7 март куни Исроил Ғазо секторига гуманитар ёрдам етказишга қайтмаса, Қизил денгиздаги кемаларга ҳужумларни қайта бошлаш билан таҳдид қилган эди.

Ямандаги ҳусийчилар 200 млрд долларлик иқтисодий зарар келтирди

Яман ҳусийчиларининг ўтган йили жаҳон савдосига етказган зарари деярли 200 миллиард долларни ташкил қилди. Денгиз орқали юк ташиш нархи беш бараварга ошди, дея хабар берди Лондонда чоп этиладиган The Economist нашри 18 январ куни.

Миср энг кўп тўғридан тўғри зарар кўрди, Сувайш каналидан тушган даромаднинг 7 миллиард долларини йўқотди - одатдаги даромаднинг учдан бир қисмини. АҚШ Қизил денгиздаги кемаларни ҳимоя қилиш учун беш миллиард доллар сарфлади.

2024 йил давомида ҳусийчилар кемаларни Африкани айланиб ўтишга мажбур қилди. Осиёдан йўналишлар тахминан олти минг километрга узайтирилди, саёҳат вақти эса 10-14 кунга кўпайди. АҚШ разведкаси маълумотларига кўра, юқори тезликда узоқроқ сафарлар ёнилғи сарфини ошириб, ҳар бир рейс нархига тахминан 1 миллион доллар қўшади. The Economist манбаларига кўра, Қизил денгиз орқали ташиш учун суғурта тарифлари 20 баравар ошди.