Суд Трампга XVIII асрдаги қонун ёрдамида мигрантларни депортация қилишни тақиқлади

Доналд Трамп ноқонуний мигрантларни оммавий депортация қилиш учун кенгроқ ваколат олиш мақсадида 1798 йилги душман давлат фуқароларига оид қонундан фойдаланишга уринди. Аммо орадан бир неча соат ўтиб, Федерал суд XVIII асрга тегишли қонундан фойдаланишни тақиқлади.

Ушбу қонундан АҚШ тарихида фақат уч маротаба фойдаланилган: 1812 йили Буюк Британия билан урушда, Биринчи ва Иккинчи жаҳон урушларида. Оқ уй баёнотида келтирилишича, мазкур қонундан қайта фойдаланиш зарурати «Трен-де-Арагуа» жиноий гуруҳининг АҚШдаги ноқонуний ҳаракатлари сабаб юзага келган.

АҚШ округ судяси Жеймс Боасберг Трампнинг фармонини блоклаб, венесуэлалик мигрантлар депортациясини 14 кунга тўхтатиб қўйди. Қарор шу куннинг ўзида Америка Фуқаролик эркинликлари ҳимояси иттифоқи ҳамда «Олға демократиря» ташкилоти томонидан киритилган даъвога жавобан қабул қилинган.

«Судга бугун эрталаб маълум бўлган фавқулодда вазиятни ҳисобга олган ҳолда ушбу иш бўйича эшитувлар белгиланмагунга қадар, зудлик билан статус-квони сақлаб қолишни талаб қилиб, қарор чиқардим», — дейилади судя Боасбергнинг қарорида.

Аввалроқ Трамп маъмурияти АҚШ ҳудудида ноқонуний юрган чет эл фуқаролари рўйхатдан ўтиши ва ўзларининг шахсий маълумотларини киритиши керак бўлган портални ишга туширганди. Ушбу талабга бўйсунмаганлар 5 минг долларгача жаримага тортилади ёки 6 ой муддатгача озодликдан маҳрум этилади.