Ёшлар етакчилари “Ibrat Academy” иловасининг пулли версиясини сотиб олишга мажбурлангани айтилди. Агентлик буни рад этди

Тармоқларда Ёшлар ишлари агентлигига тегишли “Ibrat Academy” лойиҳасининг пулли шаклини сотиб олишга тизимдаги ходимлар мажбурлангани ҳақида постлар тарқади. Унда айрим давлат хизматчиларидан “Ibrat Academy”нинг премиум версиясини олиш талаб қилингани айтилади.

“Қандайдир сертификат олиш ҳам айрим давлат хизматчиларида ихтиёрий-мажбурий равишда талаб қилинмоқда, деган хабарлар келяпти. Бунга ҳам балки ойдинлик киритилар, очиқ мулоқот бўлса”, – деб ёзган X (собиқ Twitter) тармоғи фойдаланувчиси.

Буни бошқа бир фойдаланувчи ҳам тасдиқлаган. “Ёшлар етакчиларига “Super start” лойиҳасини мажбуран сотиб олдиришяпти. Менга IELTS сертификатим борлиги учун индашмади”, – деган у.

Kun.uz гаплашган ёшлар етакчиси бу ихтиёрий-мажбурий топшириқ эканини айтди. Унга кўра, агентликнинг жойлардаги бошқармалари ходимлари етакчилардан иловани неча киши сотиб олгани ҳақида маълумот сўрайди.

Пулли вариантдан фойдаланаётган ходим лойиҳа мактабда ўргатиладиганидан ортиқ билим бермаслигини қўшимча қилди.

Kun.uz вазиятга ойдинлик киритиш учун Ёшлар ишлари агентлиги матбуот хизмати билан боғланди. Маълум қилинишича, ҳеч бир етакчига илованинг пулли вариантини сотиб олиш бўйича топшириқ берилмаган. “Агар аниқ бир маълумот бўлса, биз бу ҳолатни текширамиз”, – деди агентлик вакили.

“Ibrat Academy” – тил ўргатувчи “Ибрат фарзандлари” лойиҳасининг бир қисми бўлиб, 2022 йилда ташкил қилинган. Дастлаб лойиҳа хорижий тилларни ёшларга бепул ўргатиш мақсадида, бюджет маблағлари асосида ташкил қилинган эди. Ҳозир лойиҳанинг пулли шакли ҳам бор. Агентликнинг изоҳлашича, лойиҳа ўз-ўзини ривожлантириши учун пулли версия жорий этилган. “Бу лойиҳа, яъни “Super start” учун бюджетдан маблағ ажратилмаган”, – деди ташкилот ходими.

216 та дарсни қамраб олган “Super start” лойиҳаси обунаси 159 минг сўм, чегирма билан 127 минг сўмга сотиляпти.