Россияда Instagram’да реклама жойлаганлар жарима тўлайди

Бу ҳақда Давлат думасининг хавфсизлик қўмитасига таяниб, «Известия» нашри маълум қилмоқда.

Қонун лойиҳасига кўра, реклама тарқатиш қоидаларини бузган компаниялар 500 минг рублгача, мансабдорлар 20 минг рублгача, фуқаролар эса 2,5 минг рублгача жаримага тортилади. Тегишли ўзгартишлар «Реклама тўғрисида»ги қонуннинг 38-моддасига киритилиши режалаштирилган.

Ҳужжат Россия Иқтисодий ривожланиш вазирлиги, Рақамли ривожланиш вазирлиги, Молия вазирлиги ҳамда Федерал аксилпомонполия хизмати билан келишилган.

Дума хавфсизлик қўмитаси раиси ўринбосари Анатолий Виборныйнинг таъкидлашича, тақиққа қарамай, хорижий платформалар реклама жойлашни давом эттирмоқда. «Реклама орқали нафақат блогерлар, балки Россияга нисбатан душманона муносабатда бўлган ижтимоий тармоқлар ҳам даромад олмоқда. Буни тўхтатиш керак», — деди у.

Экспертлар таъкидлашича, бу чекловлар Россиядаги кўплаб блогерлар учун асосий даромад манбасини йўқотишига олиб келади. Heads’made агентлиги шериги Ярослав Мешалкиннинг фикрича, баъзилар бозордан кетишга ёки даромад манбайини ўзгартиришга мажбур бўлади. Унинг сўзларига кўра, контент яратувчиларнинг бир қисми VK, Rutube ва «Дзен» каби миллий платформаларга ўтиши мумкин.

Блогерлар ва агантликлар ассоциацияси вакиллари ҳам янги чекловлар ортидан реклама шартномаларини қайта кўриб чиқишга вақт етишмаслигини айтган.

PR Perfect агентлиги асосчиси Кристина Петрова бундай тақиқни блогерлик фаолияти билан шуғулланувчи, лекин ҳали ҳам мухлисларини миллий платформаларга ўтказа олмаганлар учун «сўнгги зарба» деб атади.

Қонун лойиҳаси илк ўқишда 2024 йил 23 июлда қабул қилинган, аммо кейинги муҳокамалар тўхтаб қолган эди. Лойиҳа 25 март куни иккинчи ва учинчи ўқишда қабул қилиниши кутилмоқда.