“Single Media Group” МЧЖ 2025 йилда Тошкент шаҳар ҳокимлиги ҳузуридаги Рақамли ривожланиш департаментидан кўп квартирали уйлар томига реклама конструкцияларини жойлаштириш бўйича иккита реклама жойи паспортини олган. Улардан бири 2030 йилгача, иккинчиси эса 2034 йилгача амал қилиши белгиланган.
Бироқ 2026 йил май ойида компанияга юборилган билдиришномада Тошкент шаҳрининг дизайн-коди кучга киргани, унга кўра кўп квартирали уйлар том қисмида реклама конструкцияларини жойлаштириш тақиқлангани сабаб реклама конструкцияларини 10 кун ичида демонтаж қилиш талаб қилинган.
Департамент реклама жойи паспортларини бекор қилиш чоралари кўрилаётганини маълум қилган.
Тадбиркор: «Биз қонуний рухсатнома асосида инвестиция қилганмиз»
Компания вакилининг Kun.uz'га айтишича, реклама жойлари учун давлатга катта миқдорда тўловлар амалга оширилган. Хусусан, Шота Руставели кўчасидаги реклама жойи учун шу кунгача 270,4 млн сўм, Чилонзор тумани Олмазор даҳасидаги реклама жойи учун эса 69,4 млн сўм тўланган.
Тадбиркор реклама паспортлари 2030 ва 2034 йилгача амал қилишига ишониб инвестиция киритганини, янги дизайн-код эса амалда илгари берилган ҳуқуқларни бекор қилаётганини таъкидламоқда.
Компания Омбудсманга йўллаган мурожаатида бир нечта ҳуқуқий асосларни келтирган.
Биринчидан, тадбиркор президентнинг 2026 йил 5 февралдаги ПҚ-48-сон қарорига таянмоқда. Мазкур ҳужжат билан кўп квартирали уйларни бошқариш тизими такомиллаштирилган бўлиб, унда уйларнинг умумий мол-мулкидан олинадиган даромадлар қаторида реклама жойлаштиришдан тушадиган маблағлар ҳам кўрсатилган. Қарорга кўра, реклама, мобил алоқа антенналари ва бошқа умумий мол-мулкни ижарага беришдан тушадиган даромадлар кўп квартирали уйнинг банк ҳисобрақамига йўналтирилади ҳамда мулкдорларнинг даромади ҳисобланади.
Шунингдек, қарорнинг 9-иловасида ишчи гуруҳларга кўп квартирали уйларнинг реклама жойлаштириш мумкин бўлган жойларини аниқлаш вазифаси юклатилган.
Тадбиркор айнан шу нормаларга таяниб, Президент қарорида реклама конструкцияларини, жумладан том қисмида реклама жойлаштиришни тақиқловчи норма мавжуд эмаслигини, аксинча реклама жойлаштириш даромад манбайи сифатида эътироф этилганини таъкидламоқда.
