Reuters: АҚШ божлари юзлаб канадаликни ишсиз қолдирди ва яна 100 минглаб одамга таъсир кўрсатади

АҚШ президенти Доналд Трамп томонидан Канада маҳсулотларига жорий этиладиган божлар металлургия корхоналаридаги ишловчи 100 минг канадаликка таъсир кўрсатади. Бу ҳақда United Steelworkers металлурглари касаба уюшмасининг Канада бўйича бўлинмаси директори Марти Уоррен маълум қилди.

Унинг сўзларига кўра, божлар аллақачон 200 нафар ходимнинг қисқаришига олиб келган.

«Ишини йўқотган ёки қисқартиришга тушган ҳар бир инсон — бу жиддий зарба. 2 апрелдан кучга кирадиган божлар, тахминан аъзоларимизнинг 100 минг нафарига таъсир кўрсатади», — дейди Уоррен Reuters агентлигига. Касаба уюшмасида жами 225 мингдан зиёда канадалик бор. Агентликнинг эслатишича, Канада Америка бозори учун энг йирик пўлат етказиб берувчи ҳисобланади.

Март ойида АҚШ Мексика ва Канада товарлари импортига 2 фоизли бож жорий этган эди, шунингдек, Хитойдан олиб келинадиган товарларга қўлланилган божлар 20 фоизгача оширилган. Америка ҳукумати буни ноқонуний миграция ва гиёҳванд моддалар савдосига қарши кураш чораси деб изоҳлаган.

24 март куни Доналд Трамп маъмурияти 2 апрелдан қўшимча импорт божлари жорий этилишини эълон қилди. Президентнинг ўзи 2 апрелни АҚШнинг «озодлик куни» деб атади. Шу куни ЕИ, Канада ва Мексика товарлари импортига «жавоб» божлари кучга кириши керак.

Аввалроқ АҚШ доимий савдо номутаносибликка бўлган 15 га яқин давлатдан иборат гуруҳга, жумладан, Россияга ҳам «ўзаро бож тарифларини» жорий қилишни режалаштираётгани тўғрисида хабар берилганди.