Панама Россия ва Эрон «махфий флоти»га алоқадор 128 та кемадан рухсатномани қайтариб олади

Панама ўз байроғи остида сузаётган 128 та кеманинг рухсатномасини бекор қилади, уларнинг кўпчилиги Эрон билан Россияга тегишли ва АҚШ, Украина иттифоқчилари ёки БМТ санкцияларига учраган. Бу ҳақда Bloomberg агентлигига Панама денгиз бошқармаси савдо флоти бош директори Рамон Франко маълум қилди.

Унинг сўзларига кўра, ҳозир камида 70 танкер реестрдан олиб ташланган. Ушбу ҳаракат мамлакатга 2 миллион долларгача зарар келтиради.

Савдо кемалари ўз эгалари билан чамбарчас боғлиқ бўлмаган турли мамлакатлар байроқлари остида сузади. «Байроқ давлатлари» деб аталадиган мамлакатлар ускуналар ва экипажни текшириш ва сертификатлаш орқали саноат хавфсизлиги стандартларини сақлашда асосий роль ўйнайди. Панама 8 мингдан ортиқ кемага эга дунёдаги энг йирик байроқ регистраторларидан биридир.

Россия ва Эронда нефть ва энергетика саноатига чекловларнинг кучайтирилиши «махфий флот» деб аталадиган, бутун дунё бўйлаб санкцияланган юкларни ташувчи эски ва кўпинча суғурталанмаган кемалар назоратини кучайтирди. Ўтган йилнинг октябрь ойида Панама бундай кемаларни реестрдан олиб ташлаш жараёнини соддалаштирди. Франко сўзларига кўра, бу жараён энди бир ҳафтадан бир ойгача давом этади (илгари беш ойдан олти ойгача давом этган).