Келлог 30 кунлик оташкесимдан кейин Украина можаросига барҳам берилишини айтди

30 кунлик кенг қамровли сулҳ Россия ва Украина ўртасидаги қуролли можарога барҳам бериш жараёнини бошлайди, деди АҚШ президентининг махсус вакили Кит Келлог.

«АҚШ президенти бир неча бор айтганидек, қотилликни тўхтатинг - ҳозироқ», деб ёзди у ижтимоий тармоқда.

Келлог Украина Ташқи ишлар вазирлиги раҳбари Андрей Сибиганинг Киев 12 майдан бошлаб 30 кун давомида тўлиқ ўт очишни тўхтатишга тайёрлиги ҳақидаги баёнотини шундай изоҳлади.

«Украина ва барча иттифоқчилар камида 30 кун давомида қуруқликда, ҳавода ва денгизда тўлиқ, сўзсиз ўт очишни тўхтатишга тайёр», деб ёзган эди Сибига ўз Телеграм-каналида. Унинг сўзларига кўра, агар Россия рози бўлса ва самарали мониторинг таъминланса, «узоқ муддатли ўт очишни тўхтатиш ва ишончни мустаҳкамлаш чоралари тинчлик музокараларига йўл очиши мумкин».

Россия ва Украина ўртасида ўт очиш тўхтатилган тақдирда АҚШ ва Европа Киевга қурол етказиб беришни тўхтатиши керак, деди Россия президенти матбуот котиби Дмитрий Песков бу борада.

«Акс ҳолда ўт очишни тўхтатиш Киев учун фойдали бўлади. Украина жами сафарбарликни давом эттиради, янги қўшинларни фронтга ўтказади. Ва бу муддатдан янги ҳарбий хизматчиларни тайёрлаш ва хизматда бўлганларга дам бериш учун фойдаланади», деди Песков. «У ҳолда нега биз Украинага бундай устунлик беришимиз керак?», деб сўради у.