Европа Иттифоқининг навбатдаги санкциялар пакетига Ўзбекистон компаниялари киритилиши мумкин – ОАВ

Россияга қарши санкциялар пакетига Хитой, БАА, Туркия, Сербия, Ветнам ва Ўзбекистон компаниялари киритилиши кутилмоқда.

Фото: Bloomberg

Европа Иттифоқига аъзо бўлган давлатларнинг элчилари Россияга қарши 17-санкция пакетини олдиндан келишиб олди. Улар Россиянинг «махфий флоти» таркибига кирувчи кемалар, шунингдек, Хитой, БАА, Туркия, Сербия, Ветнам ва Ўзбекистондаги компанияларга таъсир қилади. Bloomberg ва Financial Times (FT) хабарларига кўра, ушбу компаниялар энергия сотишдаги чекловларни четлаб ўтишга ёрдам бермоқда.

FT маълумотларига кўра, 149 та танкер ва 60 та компанияга чекловлар қўйилади. Уларнинг номи хабарда келтирилмаган.

Санкциялар пакетининг расман тасдиқланиши келаси ҳафта кутилмоқда.

«Бу чора-тадбирлар Москвага босимни сақлаб қолишга қаратилган, шу билан бирга Европа АҚШ президенти Доналд Трампнинг ўт очишни тўхтатиш бўйича воситачилик уринишлари ҳозирча унчалик муваффақият бермаганидан сўнг, музокаралардан чиқиб кетишидан хавотирда», дейилади хабарда.

Эслатиб ўтамиз, агар Москва ўт очишни тўхтатишдан бош тортса, ЕИ Россияга қарши навбатдаги санкциялар пакетини эълон қилмоқчи.