Россиялик олигархлар ЕИ санкциялари бўйича суд жараёнида навбатдаги мағлубиятга учради

Европа Иттифоқи қора рўйхатига киритилган россиялик олигархлар санкцияларни бекор қилиш бўйича суд курашида навбатдаги мағлубиятга учради. 5 июн, пайшанба куни Европа Иттифоқининг Люксембургдаги суди Россиянинг Украинага кенг кўламли бостириб кириши бошланганидан кейин уларни чекловчи рўйхатларга киритиш мезонларига қарши чиқишга уринаётган беш нафар россиялик миллиардернинг мурожаатларини баҳолаган бош адвокат Лайла Мединанинг фикрини эълон қилди.

Медина Дмитрий Мазепин, Дмитрий Пумпянский, Виктор Рашников, Герман Хан ва Тигран Худавердяннинг суднинг 2023 йилда уларга нисбатан қўлланган шахсий санкцияларни қонуний деб тан олган қарори устидан берган апелляцияларини рад этишни таклиф қилмоқда.

Унинг фикрича, қора рўйхатга киритиш мезонлари Европа Иттифоқи кенгашидан аниқ шахсларнинг Россия ҳукумати билан алоқаси ёки уларнинг унга таъсири борлигини исботлашни талаб қилмайди, балки иқтисодиётнинг тегишли тармоқларидаги тадбиркорларнинг етакчи роли ва таъсирига асосланади.

Бундан ташқари, Медина Россия ҳукуматига сезиларли даромад келтирувчи иқтисодиёт тармоқларидаги етакчи ишбилармонларнинг қора рўйхатга киритилиши ва санкциялардан мақсад ўртасидаги «рационал боғлиқликка» ишора қилади. Чекловчи чоралар уларнинг фаолиятига тўсқинлик қилади, бу эса Россия иқтисодиётига зарар етказиши ва Украинага қарши ҳарбий тажовуз нархини ошириши мумкин.

Бош адвокатнинг фикри Европа Иттифоқи суди учун мажбурий эмас, лекин аксарият ҳолларда суд тавсияларга мувофиқ қарор қабул қилади.

Россия олигархлари 2022 йилда Россиянинг Украинага кенг кўламли ҳужуми бошланганидан сўнг ЕИ қора рўйхатига киритилган. Ўшанда улар Европа судларига даъво аризалари билан мурожаат қилган ва 2023 йилда улар рад этилган.