NYT: АҚШ бомбардимончиларни Яқин Шарққа жўнатишда чалғитувчи тактикадан фойдаланди

АҚШ Ҳарбий-ҳаво кучлари Эрондаги ядровий объектларга зарба бериш чоғида чалғитувчи манёврдан фойдаланди.

Фото: AP / David Smith

B-2 бомбардимончи самолётларининг икки гуруҳи Миссури штатидаги авиабазадан турли йўналишларга жўнатилди, деб ёзади The New York Times Пентагондаги манбаларга таяниб.

Гуруҳлардан бири транспондерлар ёқилган ҳолда ғарбга Гуам томон учиб кетди, шунда уларни тижорат сунъий йўлдошлари орқали кузатиш мумкин эди.

Етти бомбардимончи самолётдан иборат иккинчи гуруҳ GBU-57 бункерга қарши бомбалар билан тўлиқ юкланган ва аниқланмаслик учун транспондерлари ўчирилган ҳолда Эрон томон шарққа учган.

Ҳарбийлар режасига кўра, бу Эрон томонини Америка зарбаларининг вақти ва йўналиши ҳақида чалғитиши керак эди.

NYT, шунингдек, АҚШ ҳарбийлари ва разведка ходимлари Эрон томонидан қўллаб-қувватланган гуруҳлар АҚШнинг Ироқ ва Суриядаги базаларига ҳужум қилишга тайёрланаётгани аломатларини қайд этганини ёзади.

Нашрнинг таъкидлашича, ҳозирча АҚШ ҳарбийларига қарши ҳеч қандай чора кўрилмаган ва Ироқ расмийлари гуруҳларни ҳужумлардан тийилишга кўндиришга уринмоқда.

Тайёрлаган Отабек Матназаров

#АҚШ #Эрон #Исроил

2025 йил 13 июнга ўтар кечаси Исроил Эроннинг ҳарбий ва ядровий объектларига зарбалар беришни бошлади. Бунга жавобан Теҳрон Исроил устидан бомбалар ёғдирди. 12 кун давом этган уруш, АҚШнинг Эрон ядро объектларига ҳужум қилиши билан якунланди.