Исроил Эронни жиловлаш бўйича янада кескин сиёсат бошланганини эълон қилди

Исроил мудофаа вазири Исраэл Кац Эронга қарши 12 кун давом этган «Арслондек халқ» операцияси якунланганини маълум қилди ва армияга Эрон ҳаво ҳудудини назорат қилиш режасини тайёрлашни топширди. Унинг сўзларига кўра, операция «Исроил тарихида ва жаҳон урушлари йилномасида шонли саҳифа» ёзган.

Кац сўзларига кўра, Исроил Теҳрон осмонини Исроил ҳарбий-ҳаво кучлари учун очиб, Эрон ҳаво мудофаа тизимларини йўқ қилган, Америка иттифоқчилари ёрдамида Эрон ядро дастурини издан чиқарган ва Эрон ҳарбий раҳбарияти ҳамда ядровий дастур бўйича етакчи олимларини йўқ қилган. Вазирнинг даъво қилишича, Хоминаий Исроилни йўқ қилиш дастурини ўн йиллар давомида шакллантириб келган, Исроил бу дастурга барҳам берган.

Кац Исроил армиясига Эронни жиловлаш режасини тайёрлаш, жумладан, Исроилнинг Эрон ҳаво ҳудудидаги ҳукмронлигини сақлаб қолиш, ядровий дастур ривожланишига йўл қўймаслик ва террорчилик фаолиятини қўллаб-қувватлаганлик учун ўч олиш ҳақида кўрсатма берди.

«Мен Теҳронда тишлари суғурилган илоннинг бошига эҳтиёт бўлиш ва тушунишни таклиф қиламан: «Арслондек халқ» операцияси Исроил янги сиёсатининг шунчаки реклама кўриниши эди – 7 октябрдан кейин дахлсизлик тугади», деди у.

Исроилнинг Эронга қарши ҳарбий операцияси 2025 йил 13 июндан 25 июнгача давом этди. Исроил армияси маълумотларига кўра, Ҳарбий-ҳаво кучлари 1500 дан ортиқ парвозни амалга оширган ва 900 дан ортиқ нишонга зарба берган, Эроннинг 30 дан ортиқ юқори мартабали ҳарбий амалдори йўқ қилган. Операция АҚШ президенти Доналд Трамп томонидан эълон қилинган оташкесим билан якунланди.