АҚШ Сенати Трампнинг «катта» қонун лойиҳасини маъқуллади

1 июл, сешанба куни АҚШ Сенати АҚШ президенти Доналд Трампнинг солиқ имтиёзлари ва давлат харажатларини қисқартириш ҳақидаги қонун лойиҳасини маъқуллади. Мажлис бир кундан ортиқ давом этди. Сенатда республикачилар кўпчилик бўлишига қарамай, сенаторларнинг овозлари 50 га 50 бўлди. Трампнинг «катта ва ажойиб қонуни»ни қўллаб-қувватлаш вице-президент Жей Ди Вэнснинг ҳал қилувчи овози билан амалга оширилди.

Уч республикачи сенатор, Шимолий Каролинадан Том Тиллис, Мэн штатидан Сюзан Коллинз ва Кентуккидан Рэнд Пол демократлар билан бирга Оқ уй раҳбари томонидан таклиф қилинган солиқ ва бюджет пакетига қарши овоз берди.

Мунозара давомида сенаторлар қонун лойиҳасига бир қатор тузатишлар киритди, шунинг учун энди у АҚШ Конгресси Вакиллар палатаси томонидан қайта тасдиқланиши керак. Reuters хабарига кўра, мунозара ва овоз бериш 2 июлга белгиланган. Доналд Трамп қонунни 4 июл, жума куни нишонланадиган Мустақиллик кунигача имзоламоқчи. Трамп Сенат қарорига «Вау» дея реакция билдирди, деб ёзади AFP. Ўша пайтда у Флоридадаги Эверглейдс ботқоқларида «аллигаторли Алкатрас» номини олган янги депортация марказига ташриф буюрди.

Трампнинг қонун лойиҳаси, жумладан, республикачининг биринчи даврида жорий этилган солиқ имтиёзларини узайтириш, иммиграция ва мудофаа, жумладан, «Олтин гумбаз» (Golden Dome)ракетага қарши мудофаа тизимини ривожлантириш учун маблағни кўпайтиришни назарда тутади.

Компенсация сифатида озиқ-овқат дастурлари ва иқлимни муҳофаза қилиш чоралари, шунингдек, камбағаллар, ногиронлар, кам таъминланган оилалар фарзандлари ва бошқа ижтимоий ҳимояга муҳтож шахсларнинг тиббий харажатларини тўлашга ёрдам берадиган Medicaid дастурига сарфланадиган харажатларни қисқартириш таклиф этилади. Конгресс маълумотларига кўра, ўн йил ичида Medicaid дастури доирасида 12 миллионга яқин одам соғлиғини ҳимоя қилишдан маҳрум бўлиши мумкин.