Британияда Лордлар палатасининг салкам 10 млн фунтлик эшиги бўйича текширув ўтказилади

Британия парламенти ҳисоб палатасига Вестминстер саройининг бир қисмига янги кириш эшигини ўрнатиш факти бўйича текширув ўтказиш сўрови юборилди, деб хабар беради Sky News.

Сўров муаллифи — парламент юқори палатаси спикери лорд Жон Макфолл. У эшикни ўрнатиш қиймати нима учун 60 фоизга ошиб кетгани ва нима учун 9,6 миллион фунт стерлинг турадиган эшик яхши ишламай, ҳафтасига қўшимча, 2,5 минг фунт харажатни юзага келтираётганини аниқлашни талаб қилган.

Эшик Вестминстер саройи биносининг Лордлар палатаси аъзолари учун мўлжалланган қисмига ўрнатилган. Аввалига эшикни ўрнатиш қиймати 6,1 миллион фунтни ташкил этган, аммо охир-оқибат унинг нархи салкам 10 миллион фунтга чиқиб кетган.

Эшик ўрнатилганидан кейин у орқали одамлар бинога кириши учун ичкаридан кимдир очиш тугмасини босиб туриши кераклиги маълум бўлган. Шу боис эшик олдида навбатчилик қилиши учун қўриқчи жойлаштирилган — у бинога кирадиган Лордлар палатаси аъзолари учун тугмани босиб туради.

Лордлар палатаси комиссияси томонидан ўтказилган текширув эшик билан боғлиқ муаммолар қайси босқичда — ишлаб чиқариш, ташиш ёки ўрнатишда — юзага келганини аниқлай олмаган. Лорд Макфолл, шунингдек, ҳисоб палатасидан эшик ўрнатиш лойиҳасида қарорлар қабул қилиниши сифати, шунингдек, ишлаб чиқарувчини танлаш, эшикнинг техник хусусиятлари ва шу каби бошқа жиҳатларни баҳолашни сўраган.