Сергей Лавров Украинадаги урушни тугатиш учун иккита асосий шартни айтди

Украинадаги урушни тугатиш бўйича «қонуний келишув» Россияга қарши барча санкцияларни бекор қилиш ва музлатилган активларини қайтариш бўйича бандларни ўз ичига олиши керак, деди Россия ташқи ишлар вазири Сергей Лавров Magyar Nemzet газетасига берган интервюсида.

«Россияга қарши санкцияларни бекор қилиш, Россияга қарши барча даъволарни бекор қилиш ва унинг Ғарбда ноқонуний олиб қўйилган активларини қайтариш», деб санади у.

Шу билан бирга, Лавров уруш унинг «асосий сабабларини» бартараф қилмасдан тугамаслигини, шунинг учун Кремлнинг талаблар рўйхатида «демилитаризация, денацификация» ва Украинанинг нейтрал мақоми ҳамон борлигини эслатди.

Лекин бу ҳаммаси эмас. Шунингдек, вазирнинг сўзларига кўра, жаҳон ҳамжамияти Қрим, ўзини ўзи эълон қилган Донецк ва Луҳанск республикалари, Херсон ва Запорожие вилоятларини Россиянинг бир қисми сифатида тан олиши керак. Лавровнинг фикрича, бунга 2022 йил кузида ушбу ҳудудларда ўтказилган «референдумлар» асос бўлган.

Аввалроқ, БМТ Украинанинг босиб олинган ва ҳарбий ҳаракатлар остидаги ҳудудларида референдум «халқларнинг иродаси сифатида кўрсатишга лойиқ эмаслигини» ва ҳуқуқий оқибатларга олиб келмаслигини таъкидлаган эди.