Зеленский Украинанинг АҚШдаги элчисини алмаштирмоқчи эканини тасдиқлади

Володимир Зеленский Украинанинг АҚШдаги элчисини ўзгартиришни режалаштираётганини тасдиқлади. Бу ҳақда у Римда бўлиб ўтган матбуот анжумани давомида маълум қилди.

2021 йилдан бери Украинанинг АҚШдаги элчиси лавозимида Оксана Маркарова фаолият юритиб келмоқда. Зеленскийнинг сўзларига кўра, у элчи билан гаплашган ва Маркарова Украинада фаолиятини давом эттиришига умид билдирган, аммо «кўп нарса унинг ўзига боғлиқ».

Зеленский АҚШдаги янги элчи кучли номзод бўлиши кераклигини таъкидлаб, ушбу лавозимни мудофаа вазири Рустем Умеров эгаллаши мумкинлигини айтди.

«Агар мен қарор қилсам — бу тез орада содир бўлади… Бизнинг муҳим элчимиз мудофаа вазири Рустем Умеров бўлади ва бу, албатта, Украина ҳукуматидаги жиддий ўзгаришларга таъсир қилади. Нима учунлиги тушунарли — бугун барча қарорлар, барча бюджетмиз — бу афсуски, уруш», — дейди Украина президенти.

7 июл куни Bloomberg Зеленский АҚШ президент Доналд Трамп билан телефон орқали мулоқоти давомида Вашингтондаги элчини алмаштириш масаласини муҳокама қилгани ҳақида ёзганди. Умеровдан ташқари мазкур лавозимга потенциал номзодлар орасида бош вазир Денис Шмигал, бош вазир ўринбосари Олга Стефанишина ва энергетика вазири Герман Галушенко ҳам бор.