Вадефул исроиллик кўчманчиларнинг фаластинликларга нисбатан зўравонлигини қоралади

Германия ташқи ишлар вазири Йоханн Вадефул исроиллик кўчманчиларнинг Ғарбий соҳилда яшовчи фаластинликларга нисбатан кучайган зўравонлигини қоралади. «Бундай ҳаракатлар жиноят, террор ва улар полиция томонидан таъқиб қилиниши керак», деди сиёсатчи Фаластиннинг Тайбе қишлоғига ташрифи чоғида. Вадефулнинг ташрифи «кўчманчилар зўравонлигидан азият чекаётган барча одамлар билан бирдамлик белгиси» бўлиши керак эди.

Шунингдек, ташқи ишлар вазири Исроил минтақани назорат қилувчи давлат ва ҳуқуқий давлат сифатида «хавфсизлик ва тартибни таъминлаши, жиноятчиларни жазолаши» кераклигини айтди. «У Фаластин аҳолисини бу жиноятчилардан ҳимоя қилиши керак», — дея қўшимча қилди Вадефул. Сиёсатчига кўра, Германия ҳукумати Европа даражасида зўравон кўчманчиларга қарши санкциялар қўллаш тарафдори.

1967 йилдан сўнг Иордан дарёсининг Ғарбий соҳилида Исроил аҳоли пунктлари пайдо бўла бошлади. БМТ Бош Ассамблеясининг мажбурий бўлмаган 181-сонли резолюциясига кўра, араб давлатини яратиш мўлжалланган эди. Олти кунлик уруш пайтида исроилликлар ушбу ҳудуд, шунингдек, Шарқий Қуддус ва Ғазо сектори устидан назоратни қўлга киритди.

Бир қатор давлатлар ва БМТ Исроилнинг ҳаракатларини босқинчилик деб билади. Халқаро ҳамжамият норозилигига қарамай, Исроил сўнгги ўн йилликларда Ғарбий соҳилда ўнлаб аҳоли пунктлари қурди, уларда 500 мингга яқин яҳудийлар билан бирга 3 миллионга яқин фаластинликлар яшайди. Май ойи охирида исроилликлар Ғарбий соҳилда яна 22 та аҳоли пункти қуришни режалаштираётгани маълум бўлди. Вадефул аввалроқ буни қоралаган эди.