Reuters: Путин Трампнинг Украина бўйича ултиматумини эътиборсиз қолдиради

Путин Украинадаги урушда ғалаба қозонишига ишончи комил, янги санкциялар эса мамлакат иқтисодиётига таъсир қилмайди, деб ёзади Reuters.

Фото: Михаил Метцель/РИА Новости

Россия президенти Владимир Путин АҚШ президенти Доналд Трампнинг Украинада ўт очишни тўхтатиш бўйича жума куни тугайдиган ултиматумини эътиборсиз қолдиради, деб хабар берди Reuters 5 август, сешанба куни Кремлга яқин уч манбага таяниб.

Путиннинг урушда ғалаба қозониши ва АҚШ янги санкциялари Россияга кучли таъсир кўрсатмаслигига ишончи комил, дейди агентлик суҳбатдошлари. Улардан бирига кўра, Путиннинг мақсади Украинанинг тўртта вилояти: Донецк, Луханск, Запорижжя ва Херсонни тўлиқ қўлга киритиш. Шундан кейингина у тинчлик келишувини муҳокама қилади, дейди Reuters манбалари.

Россия ва Украина ўртасида давом этаётган музокаралар моҳиятан мазмундан холи ва фақатгина Трампга Москва тинчликка қарши эмаслигини билдириши керак, деб ёзади агентлик. Reuters агентлигининг икки манбасига кўра, Путин «Трампни ғазаблантирмоқчи эмас, у Вашингтон ва Ғарб билан муносабатларни яхшилаш имкониятини қўлдан бой бераётганини тушунади, бироқ унинг ҳарбий мақсадлари муҳимроқ». Россия Бош штаби гўёки Путинга Украина фронти икки-уч ой ичида қулашини айтган, дея хабар беради Reuters манбаси.

Трамп АҚШ президентининг махсус элчиси Стивен Уиткофф Россия раҳбарияти билан музокаралар ўтказиш учун Москвага боришини бир кун аввал маълум қилган эди. Агар Россия Украинада тинчлик ўрнатишдан бош тортса нима бўлади, деган саволга Трамп шундай жавоб берди: «Демак, санкциялар бўлади. Лекин улар санкцияларни айланиб ўтишга уста. Шундай қилиб, нима бўлишини кўрамиз».