16-17 ёшли ўзбек қизлари 40-50 ёшли эркакларга нега турмушга чиқишяпти? Айримлари ҳали тегмасдан туриб ҳар ой 500 доллардан олишади… лекин буни бахт эмас, нарх дейиш мумкин. Ташқаридан романтика, ичкарида эса одам савдосига тенг ҳаёт. Ўзбек қизлари ниманинг эвазига Кореяга кетяпти? Ва нима учун уларнинг 95 фоизи бу қароридан пушаймон?
Яқинда кореялик блогер тахминан 20 ёшли ўзбек қизи ва 50 ёшлар атрофидаги корейс куёвнинг тўйидан тайёрлаган видеорепортажини “Кореяга эрга тегиш учун навбатда туришибди” сарлавҳаси остида YouTube’га жойлади. Видеода қизлар ўзлари унаштирилган корейс куёвлар ҳар ойда уларга 500 доллардан пул юбориб туриши, корейс эрлар эса меҳрибон ва масъулиятли экани таъкидланади.
Бу каби тарғибот видеолар, қизларни “хорижлик эрга тегаётган бахтли инсон” сифатида кўрсатилиши бошқаларда ҳам шундай ҳаётга ҳавас уйғотади. Кореяга келин бўлиш ҳаваси ортидаги ҳақиқатлар сизни ҳайратга солиши аниқ.
Маълумотларга кўра, Кореяга келин бўлганлар орасида Ветнам, Хитой ва Таиланд фуқаролари кўп, Марказий Осиёдан эса энг кўп келинлар Ўзбекистондан боришган. Мамлакат демографиясини ҳисобга олган ҳолда кўп ҳолатларда бу никоҳлар маҳаллий ҳокимият томонидан субсидияланади. Масалан, Жанубий Кореянинг қишлоқ хўжалиги ва балиқчилик билан шуғулланадиган 35 та минтақасида маҳаллий эркакларга хорижлик хотин олиш учун бир неча миллион вон ёрдам пули берилган. Ўзбек қизлари энг қиммат келинлардан ҳисобланади: улар учун ўртача 18,3 млн вон (16 700 $) ажратилади. Хўш, улар нега айнан ўзбек қизларини танлашади? Чунки ўзбек қизлари чиройли ва меҳнаткаш дея эътироф этилади. Юқоридаги нарх ҳозир янада ошган, қизларнинг ёши, саломатлиги, билими, кўринишига қараб айни пайтда 25-35 минг доллардан тўлашади. Бу пулнинг катта қисмини эса уларни топиб берган ўртакаш компаниялар олади. Қизларнинг хориждаги ҳаёт орзуси шу тариқа пулланади. Исми сир қолишини сўраган, Кореяга турмушга чиққан ватандошимиз бу қизларнинг 95 фоизи қаттиқ пушаймонда эканини айтди.
“Кореяга турмушга чиқиб келган 95 фоиз қизлар ажрашган, ҳали бирортасини кўрмадим корейс билан бахтли-тахтли бўлиб яшаб кетганини. Бўлса 5 фоиз бўлиши мумкин бунақалар. Жуда ёмон тақдирлар ҳам бор, пишиққина қизлар ҳам бор. Тилни билиши керак, албатта.
Мен корейс тилини жудаям яхши ўқиганман, шунинг учун Кореяда тилни, қонунни билганим учун вазиятдан чиқиб кетганман. Мендаям яхши бўлмаган, қийналганман. Битта фарзандим бор, уни олиб чиқиб кетганман, қонуний ажрашганман. Турмушга чиқиб хато қилганман деб тан оламан.
