Озарбойжон Россия билан муносабатларнинг ёмонлашгани учун жавобгар эмас – Алиев

Озарбойжон Россия билан муносабатларнинг ёмонлашуви учун жавобгар эмас ва ҳеч қачон тажовуз ёки ҳурматсизликка йўл қўймайди. Бу ҳақда Озарбойжон президенти Илҳом Алиев Al-Arabiya телеканалига берган интервьюсида айтиб ўтди.

Давлат раҳбарининг таъкидлашича, Иккинчи Қорабоғ урушининг сўнгги куни, 9 ноябрда Озарбойжон чегарада Россия вертолётини тасодифан уриб туширган.

«Дарҳол, ўша куниёқ Россия президентига қўнғироқ қилиб, узр сўрадим. Ҳалок бўлган учувчиларнинг оила аъзоларига ва Мудофаа вазирлигига зудлик билан товон пули тўладик. Биз суриштирув ишларини бошладик ва бу аянчли хатога йўл қўйганлар жавобгарликка тортилди. Аммо биз Россия томонидан бундай нарсани кўрмадик», деди президент.

Илҳом Алиевнинг таъкидлашича, Озарбойжоннинг хатти-ҳаракатлари Россиядан ҳам шундай муносабатни кутишга асос бўлган. Бироқ, AZAL йўловчи самолётининг «уриб туширилишидан» кейин Россия томонининг ҳаракатлари «кутилмаган ҳолат» бўлди.

«Ва улар ҳали ҳам нима бўлганини айтмаяпти. Демак, бу, албатта, икки томонлама муносабатларимизда жуда жиддий ҳолат. Аммо биз бу муносабатларнинг ёмонлашишини хоҳламадик. Ҳа, одамларимизнинг ҳафсаласи пир бўлди, жаҳли чиқди, хафа бўлди. Биз эртами-кечми тергов тугашини кутган эдик. Аммо кейин Россиядаги озарбойжонларга асоссиз ҳужумлар бошланди. Икки киши қийноққа солиниб, ўлдирилди. Кейинчалик келиб тушган расмий маълумотларда эса улар юрак хуружидан вафот этгани айтилган», деб таъкидлади Озарбойжон раҳбари.

Алиев сўзларига кўра, улар 20 йил олдин жиноят содир этган бўлса ҳам, бу уларга шундай муносабатда бўлишга сабаб эмас.

«Улар орасида Озарбойжон фуқаролари ва келиб чиқиши Озарбойжон бўлган Россия фуқаролари бор эди. Бу халқимизга қарши мисли кўрилмаган иш бўлди. Муносабатларнинг ёмонлашиши учун биз жавобгар эмасмиз. Конструктив ва қонуний жавоб берамиз, лекин ҳеч қачон бизга нисбатан тажовуз ёки ҳурматсизлик аломатлари ёки кўринишларига йўл қўймаймиз», деди давлат раҳбари.

2024 йил 25 декабрь куни Қозоғистоннинг Оқтов шаҳри яқинида Бокудан Грознийга учаётган AZAL самолёти ҳалокатга учради. Ҳалокат оқибатида самолёт бортидаги 67 кишидан 38 нафари ҳалок бўлди.

Алиевнинг айтишича, самолёт Грозний шаҳри ҳудудида «ташқи таъсир туфайли шикастланган ва бу бошқарувни йўқотишга» олиб келган. Июль ойида у Озарбойжон ҳалокат муносабати билан Россияга қарши халқаро судларга мурожаат қилиш учун ҳужжатларни тайёрлаётганини айтганди. Алиев Боку мунтазам равишда Россия Тергов қўмитасига сўров юбораётганини, бироқ унга фақат «тергов давом этмоқда» деган жавоб келаётганини маълум қилди. Унинг фикрича, бундай позиция «тескари натижа беради».

Azerbaijan Airlines самолётининг қулаши ва Россиянинг содир бўлган воқеа учун айбини тан олмаслиги Москва ва Боку ўртасида дипломатик жанжал ва совуқликка олиб келган.