АҚШда 800 долларгача бўлган товарларга ҳам бож солиш тартиби тўлиқ кучга кирди

АҚШ президенти июл ойи охирида имзолаган фармон билан, 29 августдан бошлаб “de minimis” тариф имтиёзи тугатилди.

“De minimis” имтиёзи – АҚШга кириб келувчи, қиймати 800 доллар ёки ундан кам бўлган жўнатмаларни бождан озод қилишни назарда тутарди.

Бу имтиёз тугатилиши билан, энди Қўшма Штатларга юбориладиган ҳар қандай қийматдаги жўнатмалар учун бож ҳисобланади. Бож ставкаси жўнатувчи давлатнинг товарларига нисбатан ўрнатилган тарифларга асосан, 10 фоиздан 50 фоизгача бўлиши мумкин.

Натижада, 30 дан ортиқ давлатнинг почта операторлари АҚШга жўнатмаларнинг айримлари ёки аксариятини вақтинча тўхтатиб қўйди. Уларга янги тартибга мослашиш учун вақт керак.

Президент Доналд Трамп аввалига “de minimis” имтиёзини 2 майдан бошлаб Хитой ва Ҳонгконгдан келадиган жўнатмалар учун бекор қилганди ва бу – Shein, Temu ёки Aliexpress кабилардан товар буюртма берадиган америкаликлар чўнтагига зарба бўлганди. Мана энди, 29 августдан эътиборан, дунёнинг барча мамлакатларидан АҚШга кириб борган кичик жўнатмалар ҳам солиққа тортилади.

Қайд этиш керак, ўтган ойларда Shein ва Temu компаниялари АҚШда тақсимот марказларини очиб, харажатларнинг бир қисмини камайтиришга муваффақ бўлишган.

“De minimis” – лотинча атама бўлиб, “энг арзимас нарсалар ҳақида” деган маънони англатади. АҚШда шу ном билан аталувчи тартиб 1938 йилда жорий қилинган бўлиб, ўшанда майда-чуйда суммадаги божларни ҳисоблаш ва ундириш – божхона ходимларининг вақт кетказишига арзимайди деган қарорга келинган.

АҚШ божхона хизматига кўра, ўтган йили “de minimis” қоидасига биноан бож тўламасдан мамлакатга қарийб 1,4 миллиард жўнатма кириб келган бўлиб, уларнинг умумий қиймати 64 миллиард доллардан ошган.

Доналд Трамп ҳам, ундан олдин президент бўлган Жо Байден ҳам бу сиёсатни танқид қилиб, у сабаб АҚШ ишлаб чиқарувчилари зарар кўраётганини иддао қилган. Улар, шунингдек, бу имтиёз ноқонуний товарлар, жумладан фентанил каби гиёҳванд моддалар контрабандасида ҳам ишлатилаётганини айтган.