Трамп: АҚШ Полшада қўшинларини сақлаб қолади ва ҳаттоки кўпайтириши мумкин

АҚШ ўз қўшинларини Полшадан олиб чиқиш ниятида эмас – бу ҳақда АҚШ президенти Доналд Трамп 3 сентябр, чоршанба куни Вашингтонда ўзининг яқинда сайланган полшалик ҳамкасби Карол Навроцкийни қабул қилиш чоғида айтиб ўтди. Трампнинг қўшимча қилишича, АҚШнинг Полшадаги ҳарбий иштироки ҳатто «поляклар хоҳласа» оширилиши ҳам мумкин.

«Биз Полшадан қўшинларни олиб чиқиш ҳақида ҳеч қачон ўйлаб кўрмаганмиз. Буни бошқа давлатларга нисбатан ҳам кўриб чиқамиз, лекин биз Полшани тўлиқ қўллаб-қувватлаймиз ва унга ўзини ҳимоя қилишда ёрдам берамиз», — деди Оқ уй раҳбари. Трамп, шунингдек, Вашингтон ва Варшава ўртасидаги муносабатлар ҳар доим мустаҳкам бўлганини, аммо «ҳозир улар ҳар қачонгидан ҳам яхшироқ» эканини айтди. 

Навроцкий учрашув натижаларини қуйидагича изоҳлади: «Трамп Полшага хавфсизлик кафолатларини берди ва ҳарбий соҳадаги иттифоқчилар сифатида ҳамкорлигимизни таъкидлади, бу катта муваффақият». Полша президенти америкалик ҳамкасби билан Американинг Полшадаги ҳарбий иштирокини ошириш бўйича аниқ таклифларни муҳокама қилганини айтди. Навроцкий, шунингдек, Трампни Варшавага ташриф буюришга таклиф қилди, бу таклиф қилинган ташриф санаси ҳали аниқлаштирилмаган.