Чарли Киркни ўлдиришда гумонланган шахс қўлга олинди. Уни ўз отаси «топширган»

«Жуда катта эҳтимол билан биз Киркни ўлдирган одамни қўлга олдик. Ҳамма аъло даражада ишлади», деди у Fox News телеканали эфирида.

Президент унинг шахсини очиқламади ва қотилни қўлга олишда унга «жуда яқин» бўлган шахс ёрдам берганини айтди, кейинроқ аниқлик киритиб, бу гумонланувчининг отаси эканини маълум қилди.

«Ота ўғлини таслим бўлишга ишонтирди», деди президент ва ҳозирча бу маълумот нотўғри бўлиши мумкинлигини, чунки у эшитган нарсаси ҳақида гапираётганини қўшимча қилди.

Ушбу маълумотларга аниқлик киритиш сўровига жавобан Трамп гумонланувчининг отаси ўғлига «Биз боришимиз керак», деганини айтди. «Улар машинада полиция бошқармасига боришди ва у ҳозир ўша ерда», – дея қўшимча қилди президент.

Кейинчалик матбуот анжуманида Федерал қидирув бюроси томонидан маълум қилинишича, Тайлер Робинсоннинг оила аъзоси содир бўлган воқеа ҳақида оила аъзосининг дўстига айтган, у Вашингтон округи шерифи идораси билан боғланган, шундан сўнг маълумот катта терговчиларга, жумладан, ФҚБга етказилган.

Кейинчалик CNN ва ABC телеканаллари ота ўғлини таслим бўлишга кўндиргани, кейин ёшлар черкови руҳонийси билан боғлангани, у эса АҚШ Маршаллар хизматига (федерал суд ижрочилари хизмати) мурожаат қилиб, уларга маълумот берганини хабар қилди.

Юта штати губернатори Спенсер Кокс матбуот анжуманида «тўғри иш қилган» ва уни ҳуқуқ-тартибот идораларига олиб келган Тайлер Робинсоннинг оила аъзоларига миннатдорчилик билдирди.

ФҚБ директори Кэш Пател тергов «тарихий ютуқ»га 33 соат ичида эришишга муваффақ бўлганини таъкидлади.

Трампнинг сўзларига кўра, дастлаб терговда «мутлақо ҳеч нарса бўлмаган». «Биз у чумолига ўхшаб кўринган видеоёзувдан бошладик - бу деярли бефойда эди. Видеода шунчаки у ерда кимдир борлиги кўринган». Қидирувда бўлган гумонланувчининг аввалроқ ФҚБ томонидан эълон қилинган видеосида у ўқ узилган бино томидан тушиб, сўнг жиноят жойидан қочиб кетгани акс этган.

Трамп қўлга олинган шахс айбдор деб топилса, у ўлим жазосига ҳукм қилинишига умид билдирди.

«Кирк энг яхши одам эди, у бунга лойиқ эмасди», – деди Трамп.

У сафдошининг дафн маросимига келишга ваъда берди ва унинг ўлдирилиши акс этган видеони кўрмагани, чунки уни тириклигидаги каби эслаб қолишни хоҳлаётганини айтди. Унинг сўзларига кўра, Кирк унга «ўғлидек» бўлган ва унга тикток бўйича ёрдам берган.

Қўлга олинган шахс ҳақида нималар маълум?

Трамп гумонланувчи айнан ким эканини очиқламаган, фақат унинг ёши ҳақида маълумот берган: 28 ёки 29 ёшда. Кейинроқ аниқлик киритилишича, қўлга олинган шахс Юта штатида яшовчи 22 ёшли Тайлер Робинсондир. BBC Verify журналистлари Тайлер Робинсон билан боғлиқ ижтимоий тармоқлардаги аккаунтларни ўрганиб чиқди.

Facebook’даги саҳифалардан бири унинг онасига тегишли бўлиши мумкин, у сўнгги воқеалардан кейин Тайлер акс этган суратларни ўчириб ташлашга киришган. Саҳифадаги маълумотларга кўра, оила отишма содир бўлган университетдан тахминан уч соатлик масофада жойлашган Сидар-Сити шаҳрида яшайди.

Унинг аккаунти оилавий ҳаётнинг кўплаб тафсилотларини очиб беради ва уларнинг саёҳатларига оид фотосуратларни ўз ичига олади – уларнинг баъзилари ўқ отиш клубларида олинган.

Саҳифасидаги бошқа постлар Тайлер Робинсон Pineview ўрта мактабида ўқиганини кўрсатади. 2022 йилда у Юта штат университетида ўқиш учун Логан шаҳрига кўчиб ўтган – бу отишма содир бўлган жойдан тахминан икки соатлик йўл.

Киркнинг ўлдирилиши ҳақида нималар маълум?

Трампнинг сайловолди кампаниясидаги асосий иттифоқчиларидан бири бўлган ва унинг ғалабасига ҳисса қўшган 31 ёшли Кирк чоршанба куни Utah Valley университети кампусида нутқ сўзлаётганда отиб ўлдирилди.

АҚШ президенти Киркнинг ўлдирилиши учун жавобгарликни «радикал сўллар» зиммасига юклади, чунки Кирк Америка сиёсатидаги консерватив қанотнинг энг кўзга кўринган шахсларидан бири ва АҚШдаги кўплаб ёш консерваторларнинг кумири эди.

Бунга жавобан сўл сиёсатчилар Трампни фитна қўзғатишда айблади ва Киркнинг ўлдирилиши ҳақидаги нутқларида у бошқа сиёсий лагер вакилларига кўплаб ҳужумлар уюштирганини тилга олмаганини эслатди.

Ҳуқуқ-тартибот идоралари маълум қилганидек, Чарли Киркга қарата отилган ягона ва ҳалокатли ўқ, катта эҳтимол билан, дебатлар бўлиб ўтган университет ҳовлиси яққол кўриниб турадиган Losee Center биноси томидан отилган. Мерган Кирк ўтирган жойдан тахминан 130 метр (142 ярд) масофада эди.

Пайшанба куни бўлиб ўтган матбуот анжуманида ФҚБ махсус агенти қотилликда қўлланган қурол топилганини маълум қилди. Қурол таҳлил учун лабораторияга юборилган.

CBS телеканалин манбалари бу 30-06 калибрли Mauser милтиғи эканини маълум қилди. Шунингдек, криминалистлар гумонланувчининг оёқ кийими, кафти ва билак изларини топган.

Кейинроқ Юта губернатори Кокс терговчилар қора сочиққа ўралган қўл затворли милтиқ топгани, қуролга эса оптик нишонга олиш учун планка ўрнатилганини маълум қилди.

Отилмаган учта гилзада қуйидагича ёзувлар бўлган: «Эй, фашист! Мана!», «o bella ciao, bella ciao» («Bella ciao» - фашистлар Германиясининг босқинчи қўшинларига қарши курашган италян қаршилик ҳаракатига бағишланган қўшиқ) ва «агар буни ўқиётган бўлсанг – гейсан, ҳа-ҳа».

Полиция гумонланувчи ташқи кўринишидан талабага ўхшагани туфайли «университет муҳитига яхши мослашгани»ни қайд этган.