Чехия чегарани қўриқлаш учун Полшага учта вертолёт юборди

Россиянинг учувчисиз учоқлари Полша ҳудудига бостириб киргач, Чехиянинг Намешти-над-Ославу шаҳридаги 22-вертолёт авиация базасидан учта вертолёт қўшни давлатга унинг шарқий чегарасини қўриқлаш учун етиб келди.

Фото: X / ArmadaCR

Чехия Россиянинг учувчисиз учоқлари Полша ҳаво ҳудудига бостириб кирганидан сўнг ўзининг шарқий чегарасини қўриқлашда ёрдам бериш учун Полшага учта вертолёт юборди. Бу ҳақда 14 сентябр, якшанба оқшомида Чехия Республикаси қуролли кучлари X ижтимоий тармоғида хабар берди.

«Бугун Полшага учта Чехия вертолёти етиб келди, бу бизнинг яқин иттифоқчимиз шарқий чегараси ҳаво ҳудуди мудофаасини кучайтиради. Улар сўнгги манзилга яқин соатларда етиб боради. Бизнинг учувчиларимиз яқин орада Полша ҳаво ҳудудини ҳимоя қилишни бошлайди», — дейилади постда.

Ўз навбатида, Полша Қуролли кучлари Бош штаби аниқлик киритишича, вертолётлар Намешти-над-Ославудаги 22-вертолёт авиация базасига тегишли ва улар аллақачон Полшада. «Ушбу бўлинма аскарлари ўтган йили Полшанинг жануби-ғарбий ҳудудларида содир бўлган сув тошқини пайтида ёрдам кўрсатиб, мамлакатда фаолият олиб борган», — дейилади ўша постда.