Трамп Мемфисга Миллий гвардия жангчиларини жўнатишини эълон қилди

АҚШ президенти Вашингтондан кейин Мемфисга Миллий гвардия бўлинмаларини жойлаштирмоқчи. Трампнинг сўзларига кўра, бу жиноятга қарши курашиш учун зарур.

Фото: Valerie Plesch/Bloomberg via Getty Images

АҚШ Миллий гвардияси қўшинлари жиноятчиликка қарши курашиш учун Мемфис шаҳри (Теннесси штати)га юборилади. Бу ҳақда АҚШ президенти Доналд Трамп маълум қилди.

«Биз Мемфисга борамиз. Мемфис чуқур инқирозда. Биз буни худди Вашингтондаги каби тузатамиз», деди Трамп Fox News телеканали эфирида.

Трамп Миллий гвардия қўшинларини Мемфисга жойлаштириш режаларини, уларни Чикагога жўнатиш ҳақидаги олдинги режаларига қаршилик кўрсатилиши фонида эълон қилди. 7 сентябр куни Чикагода минглаб одамлар намойишга чиқди ва Иллинойс штатининг демократик губернатори Жей Би Прицкер Трамп «Америка шаҳрига уруш билан таҳдид солаётганини» айтди.

Миллий гвардия бўлинмалари август ойида Вашингтонга юборилган эди. Бу кучлар ўқотар қурол олиб юриш ҳуқуқига эга. Улардан фақат «охирги чора сифатида ва фақат ҳаёт ёки соғлиқ учун бевосита таҳдидга жавоб сифатида» қўлланиши мумкин, дейилади Миллий гвардияни назорат қилувчи қўшма ишчи гуруҳ баёнотида.

Тайёрлаган: Отабек Матназаров

#Доналд Трамп #Мемфис