УEФА Исроилни четлатиш масаласини яна бир бор муҳокама қилади – ОАВ

Европа футбол ассоциациялари иттифоқи (УЕФА) келаси ҳафта Исроилни четлатиш ёки четлатмаслик ҳақида қарор қабул қилиши керак, ташкилот ижро қўмитасининг аксарият аъзолари санкцияларни қўллаб-қувватламоқда, деб ёзди The Times.

Бу ҳафта УЕФА Исроилнинг ҳаракатларига қандай муносабат билдириши бўйича «юқори даражадаги жиддий мунозаралар» ўтказди, деб хабар берди газета.

Исроилнинг четлатилиши тарафдорлари 2022 йилда Украинада уруш бошлаганидан кейин четлатилган Россия терма жамоалари ва клублари мисолига ишора қилмоқда.

Аввалроқ, Israel Hayom нашри дипломатлар ва спорт раҳбарларининг, шунингдек, «Америка расмийларининг» саъй-ҳаракатлари туфайли Исроилни УЕФА турнирларидан четлатиш масаласи энди кун тартибида эмаслиги ҳақида хабар берди.

Август ойида Фаластин ҳудудлари бўйича БМТ махсус маърузачиси Франческа Албанезе УЕФА ташкилотига мурожаат қилиб, Исроилни барча мусобақалардан четлатишга чақирган эди.

The New York Times хабарига кўра, АҚШ Исроил терма жамоасини 2026 йилги жаҳон чемпионатидан четлатишга қаратилган ҳар қандай уринишларни «бутунлай тўхтатиш» учун барча саъй-ҳаракатларни амалга оширади.

Исроил терма жамоаси ҳали жаҳон чемпионатига йўлланма олмаган, у I саралаш гуруҳида иккинчи ўринда бораётган Италия билан бир хил (тўққизтадан) очко тўплаган ҳолда учинчи ўринни эгаллаб турибди. Гуруҳ етакчиси Норвегия ҳисобида 15 очко бор. Гуруҳ ғолиби турнирга тўғридан-тўғри йўл олади, иккинчи ўринни эгаллаган жамоалар эса кейинги саралаш босқичига чиқади.