АҚШ Энергетика вазирлиги ходимларга «яшил» сўзини ишлатишни тақиқлади

Бу президент Доналд Трампнинг иқлим бўйича сиёсати билан боғлиқ. Оқ уй раҳбари иқлим ўзгариши ҳақидаги огоҳлантиришларни «дунёда содир этилган энг катта фирибгарлик» деб ҳисоблайди.

Фото: AP

АҚШ Энергетика вазирлиги «иқлим ўзгариши», «ташланма», «яшил» ва «декарбонизация» сўзлари ва ибораларини «ишлатишдан сақланиш керак бўлган сўзлар рўйхатига» киритди, деб ёзди Politico.

Қайд қилинишича, рўйхатда «энергетик ўтиш», «барқарор ривожланиш / барқарор», «тоза энергия / ифлос энергия», «углерод /CО2 изи» каби сўзлар ва иборалар ҳам бор.

Иқлим ўзгаришига олиб келадиган чиқиндиларни камайтириш технологияларига давлат томонидан сармоя киритиш билан шуғулланадиган Энергия самарадорлиги ва қайта тикланадиган энергия бошқармасида ушбу иборалардан фойдаланиш тақиқлаб қўйилган.

АҚШ президенти Доналд Трампнинг иқлим бўйича сиёсати аввалги президент Жо Байден маъмурияти олиб борган сиёсатдан кескин фарқ қилади.

Байден даврида яшил энергетика қўллаб-қувватланди, унинг ўзи бир неча бор глобал исишдан хавотир билдирди - масалан, уни инсониятнинг мавжудлиги учун ядро урушидан ҳам жиддийроқ таҳдид деб атади.

Трамп иқлим билан боғлиқ муаммоларга ишонмаслигини таъкидламоқда. У 23 сентябр куни БМТ Бош Ассамблеясида сўзлаган нутқида иқлим ўзгариши ҳақидаги огоҳлантиришлар «дунёда содир этилган энг катта фирибгарлик» эканини айтди. Шунингдек, у турли мамлакатлардаги тоза энергия лойиҳаларини танқид қилиб, уларни «янги яшил фирибгарликнинг» бир қисми, углерод изини эса «сафсата» деб атади.

АҚШ Энергетика вазирлиги Трампнинг сиёсатини қўллаб-қувватламоқда. Politico нашрининг таъкидлашича, ўтган ҳафта вазирлик қайта тикланадиган энергетика соҳасидаги 13 миллиард долларлик лойиҳаларни молиялаштиришни бекор қилган. Шунингдек, шамол ва қуёш энергияси учун имтиёзларни танқид қилган – улар ҳам бекор қилиниши кутилмоқда.